VOV4.K’ho- Mho ngai 29/05, Thủ tướng Cíñ phủ ồng Phạm Minh Chính mờ Mpồl lơh broă bơh Cíñ phủ dê geh dơ̆ lơh broă mờ Ƀan Thường vụ Tỉñ ủy Sơn La bè cồng nha bơtàu tơnguh lơh sa- mpồl bơtiàn, sền gàr dà lơgar mờ lơngăp lơngai, bơ̆t bơtàu ală anih lơh broă cíñ trị nam 2021 mờ ală nhai bồ nam 2022, gùng dà broă lơh mờ kơnòl broă tàm tơngai tus.

Ồng Phạm Minh Chính jờng rơ mờ đơs niam ngan cồng nha mờ Đảng ƀộ, Gơnoar ătbồ mờ làng bol càr Sơn La lơh geh tàm tŭ lơh jăt kơnòl broă bơtàu tơnguh lơh sa- mpồl bơtiàn tàm tơngai lài, pơgồp bơnah tàm bơta bơtàu tơnguh bơh jơh gùt lơgar dê. Bè nùs nhơm sồr lơh tàm tơngai tus, Thủ tướng ồng Phạm Minh Chính sồr pơn jăt tai mblàng yal, lơh jăt kràñ cê jơh nùs dùl ròt bal, geh cồng nha Kơrnoăt Pơrjum dờng dơ̆ XIII bơh Đảng dê, Kơrnoăt Pơrjum dờng Đảng ƀộ càr, ală Kơrnoăt tơngume is bơh Dà lơgar dê, tàm hơ̆ geh ală kơrnoăt mờ geh ai lơh jăt bè ù tiah, bè lơh broă sa sươn sre, cau lơh broă sa, ƀòn lơgar mờ bè lơh sa bal, Kơrnoăt Ƀộ Cíñ trị dê bè gùng dà broă lơh bơtàu tơnguh lơh sa- mpồl bơtiàn, sền gàr niam dà lơgar, lơngăp lơngai tàm tiah dòr kơh mờ tiah kơh bơnơm đah tô dà lơgar.

Cau mblàng Lơ Mu K’Yến