VOV4.K’ho- Mho ngai 19/08, Thủ tướng Cíñ phủ ồng Phạm Minh Chính lơh broă pờ tơlik tơn tàm internet bè broă lơh bơtàu tơnguh drà kă bro mờ ală anih lơh broă ala mat kă bro Việt Nam tàm lơgar ndai.

Anih tàm dơ̆ lơh broă

Tàm pơrjum, Thủ tướng Cíñ phủ ồng Phạm Minh Chính bal mờ Ƀộ Kông thương, ală Ƀộ, ngàñ pơrjum pờ tơlik tơn tàm internet mờ ală anih lơh broă Thương vụ Việt Nam tàm lơgar ndai neh cribơyai ală broă lơh tơnguh uă tơngai lơh broă, geh cồng nha broă lơh kă bro, bơtàu tơnguh mờ lơh lila drà kă bro, di pal mờ jơnau sồr, kơnòl broă tàm bơta pa. Ală Thương vụ Việt Nam tàm lơgar ndai neh tơrgùm yal bè bơta pràn, bơta ƀuơn, jơnau kờñ bơh ală drà kă bro mờ jơnau sồr pal geh bơh ală drà kă bro do dê; ală broă lơh nàng lơh geh jơnau kờñ, jơnau sồr pal geh bơh drà kă bro dê. Jat jơnau yal bơh Ƀộ Kông thương dê, nam 2021, priă lơh geh bơh kă bro phan hờ lơgar ndai bơh lơgar Việt Nam dê geh rlau 670 tơmàn dolar Mỹ, ai lơgar Việt Nam mŭt tàm mpồl 20 rài lơh sa geh broă lơh kă bro mờ lơgar ndai dờng ngan rlau jơh gùt plai ù dê. 7 nhai bồ nam 2022, priă lơh geh bơh kă bro phan hờ lơgar ndai bơh lơgar Việt Nam dê lơh geh rlau 433 tơmàn dolar Mỹ. Kờp dŭ lài jơh gùt nam, priă lơh geh bơh  kă bro phan hờ lơgar ndai bơh lơgar Việt Nam dê geh lơh geh pơgap 800 tơmàn dolar Mỹ, ai lơgar Việt Nam brồ guh tàm mpồl bơh 10 tus 15 rài lơh sa geh broă lơh kă bro mờ lơgar ndai dờng ngan rlau jơh plai ù dê.

Cau mblàng K’Hạnh