Jat jơnau yal, qúy 1 nam do, bơta lơh sa mpồl bơtiàn càr Thừa Thiên- Huế dê pơn jat tai geh uă bơta niam ngan, tàm hơ̆ kờp jơh priă bơcri jơh gùt mpồl bơtiàn kờp dŭ geh pơgap 5 rơbô tơmàn đong, gơguh rlau 9% pơndrờm bal dùl tŭ mờ nam lài. Tơm priă dia gơguh 3,5%.

Thủ tướng ồng Phạm Minh Chính jờng rơ bơta pơnđơl pràn lơh ngan mờ cồng nha lơh geh bơh Đảng ƀộ, gơnoar atbồ, ling klàng mờ làng bol càr Thừa Thiên- Huế dê, pơgồp bơnah kwơ màng tàm cồng nha bal bơh gùt lơgar dê. Tơngai tus, Thủ tướng sồr, kơlôi sơnơng, lam lơh jat geh cồng nha Nghị quyết Pơrjum dờng dơ̆ XIII bơh Đảng, Nghị quyết Pơrjum dờng Đảng ƀộ càr dê. Là tiah geh uă bơta ƀuơn, bơta pràn bơtàu tơnguh, ngan là bè lơh sa dà lềng, lòt nhơl, niam chài kah yau- brê bơnơm, càr pal sền gròi bơtàu tơnguh bơnĕ bơnài bal ală gah lơh sa- bơta niam chài- mpồl bơtiàn mờ sền gàr tiah ơm kis ƀòn brê bơnơm pơgồp bal mờ gàr niam sền gàr dà lơgar, lơngap lơngai; sền gròi broă lơh bơt bơtàu Đảng mờ bơt bơtàu ală anih lơh broă sră nggal tam klăc bal, dùl nùs bal, song dơ pă, làng bol lơh tờm mờ geh cồng nha.