VOV4.K’ho- Drim ngai 24/07, tàm dơ̆ lòt còp mờ lơh broă tàm càr Nghệ An, Thủ tướng Cíñ phủ ồng Phạm Minh Chính bal mờ mpồl lơh broă neh lòt còp mờ lơh broă mờ Gah đơng lam Quân khu 4. Đơs jơnau tàm do, Thủ tướng Cíñ phủ ồng Phạm Minh Chính đơs sùm: “Ờ geh quân khu lơi geh uă ƀlàng tơ̆p ƀồc cau ling chơ̆t màng bè quân khu 4, geh uă cau ơm bĭc wơl tàm bă ù bơh Quân khu 4 dê.

Thủ tướng lơh broă mờ Gah đơng lam Quân khu 4

Quân khu 4 pal lơh niam rlau tai broă lơh kis gĭt jơnau gĭt adat, ai tơl bơta niam ngan rlau tai ai làng bol, kwang bàng gùt lơgar in lơh jăt ală broă lơh kah rơngal cau geh màng, hìu bơnhă cíñ sac, còp ală ƀlàng tơ̆p ƀồc cau ling chơ̆t màng, chu ñàng, kah kơlôi ală cau khin cha jak chài, cau ling chơ̆t màng”. Tàm 2 rài tam lơh mờ bol sò tơm Tây mờ bol sò tơm Mỹ mờ sền gàr Dà lơgar, ù tiah Quân khu 4 geh 198 rbô 659 nă cau ling chơ̆t màng, 113 rbô 597 nă cau ling sồt să, 12 rbô 316 nă Mè Việt Nam khin cha jak chài, 51 rbô 286 nă cau gơtìp aniai tài bơh sơnơm khih dioxin.

Mho ngai 24/07, Thủ tướng Cíñ phủ ồng Phạm Minh Chính lơh broă mờ Ƀan Thường vụ Tỉñ ủy Nghệ An bè bơta lam lơh jat, cồng nha lơh jat Nghị quyết Pơrjum dờng dơ̆ 13 bơh Đảng mờ Nghị quyết Pơrjum dờng Đảng ƀộ càr dơ̆ 19, tơngai lơh broă bơh nam 2020 – 2025. Jat jơnau yal bơh càr Nghệ An dê, 6 nhai bồ nam 2022, Kờp jơh phan bơna lơh geh tàm ù tiah càr dê kờp dŭ gơguh 8,44% (ơm dơ̆ 2 tiah đah Tô tàm gùl  lơgar, ơm dơ̆ 18/63 càr, ƀòn dờng gơwèt dà lơgar dê). Tiah drơng broă geh bơta bơtàu tơnguh pràn, kờp dŭ gơguh 9,22%. Tàm dơ̆ lơh broă, Kwang đơng lam bồ càr Nghệ An neh geh jơnau đơs, jơnau dan mờ Cíñ phủ, Thủ tướng Cíñ phủ bè broă tam gơl dùl ròt rơndap ù tiah Ƀlàng rơndeh par dunia Vinh nàng tơnguh bơta pràn pơndiang năc tus nam 2030 bơh 08 tơlak nă năc tus 12 tơlak nă năc dùl nam; sồr jòi broă lơh hòi jà tă pơgồp priă jền nàng lam lơh gơl gùng rơndeh ntoăt răt Vientian mờ Hà Nội; dan mờ Thủ tướng Cíñ phủ mờ ală ƀộ, ngàñ lơh broă dà lơgar sền gròi dong kờl priă tă tơm priă jền ai ù rơndap broă lơh lơh niam wơl, pờ ơnàng gùng rơndeh dờng 1 gơl lòt gan ù tiah càr Nghệ An dê...

Thủ tướng lơh broă mờ Ƀan Thường vụ Tỉñ ủy Nghệ An

Tơnơ̆ kơno jơnau đơs cribơyai, đơs tàm dơ̆ lơh broă, Thủ tướng Cíñ phủ ồng Phạm Minh Chính đơs loh, càr kờñ pal kờp sền wơl ală rơndap broă lơh tài bơh priă jền ờ hoan geh, pal sac rơwah broă lơh di broă, di anih, dùl ròt bal, lơh broă lơi jơh tơn  broă hơ̆. Gơ hòi gơ jà bơcri priă geh uă tam gơl pa, mơya ờ hềt geh uă bơta bơtàu tơnguh mhar, ờ hềt geh ală mpồl lơh sa kă bro dờng lơi bơcri priă lơh tàm tiah do. Tàm tơngai tus, Nghệ An pal lơh ngan tam gơl bơta kơlôi sơnơng, bơta sền sơnơng broă lơh jŏ jòng, ngui uă ngan rlau jơh bơta ƀuơn, bơta pràn krơi is, tơngai niam ngan, bơta kwơ tam pơrlòng, hòi jà tơl priă jền di mờ adat boh lam bơh mpồl bơtiàn, làng bol dê nàng bơtàu tơnguh.

Cau mblàng Lơ Mu K’ Yến mờ K’Hạnh