VOV4.K’ho- Drim ngai 18/4, Thủ tướng Cíñ phủ ồng Phạm Minh Chính neh lòt còp, pơn jờng cau pơrlòng, cau pơlam tàp mờ sền sơ wì broă bơyai lơh SEA GAMES 31 tàm anih tờm pơlam tàp tàp pràn să jan dà lơgar mờ hìu pơrlòng ntoat tàm hìu Mỹ Đình, ƀlàng coh plai dà lơgar Mỹ Đình. Mpồl kwang bàng, cau pơlam tàp, cau pơrlòng tàp pràn să jan bơh anih tờm geh lơh ngan pơrlòng, ơn bơta lơh ngan uă lơh geh jơnau kờñ ai geh rlau 100 gai lòng tàm SEA GAMES 31 do.

Tàm dơ̆ tìp mat, Thủ tướng Phạm Minh Chính kơp kờñ ală cau pơrlòng, cau pơlam tàp tàp pràn să jan, ală mpồl pơrlòng mờ mpồl tàp pràn să jan Việt Nam pơn jat tai gàr kơ̆ bơta tam klac bal, ring bal, tơnguh ală cồng nha lơh geh bơh ală tŭ tơngai, lơh ngan sơrlèt gan ală bơta lòng, kal ke, jơh nùs pơlam tàp jơh bal bè nùs nhơm, pràn kơldăng să jan, mờng chài rơcang lài nàng lơh geh cồng nha niam ngan rlau jơh, uă ngan rlau jơh gơtùi tàm SAE GAMES 31. Thủ tướng đơs nền, SEA GAMES 31 là tŭ niam mờ bơta ƀuơn nàng gah tàp pràn să jan Việt Nam in ai tơnggŏ nùs nhơm pràn kơldang, bơta pràn să jan, ai geh cồng nha khà dùl gùt mpồl. Do kung là tŭ nàng lơgar he pơn iờ să geh yal tơnggit bè rùp să, kòn bơnus Việt Nam tus mờ nac nhơl chờ dunia.

Cau mblàng K’Duẩn