VOV4.K’ho- Ngai 18/9, Thủ tướng Cíñ phủ ồng Phạm Minh Chính mờ mpồl kwang bàng neh lòt sền tiah lam lơh, sền sơ wì, chul chồl broă lơh lơh 3 hìu sơnơm dờng tàm càr Hà Nam geh anih sồ 2 Hìu sơnơm khoa cau kra, anih sồ 2 Hìu sơnơm Việt Đức mờ anih sồ 2 Hìu sơnơm Bạch Mai.

Ală anih do geh Ƀộ Y tế ring bal tàm nam 2014, sơn đờm lam lơh nam 2015, geh kơp kơnờm lơh gơs tàm nam 2017, bulah bè hơ̆ tus tŭ do kung ờ hềt gơtùi lơh broă ngan ngồn sơl. Thủ tướng sồr Ƀộ Y tế mờ ală Ƀộ, gah broă lơh dà lơgar đal git loh ală bơta kòl yan, ngan là bơta tìs bơh broă crơng gơs rơndap broă lơh, pơlam bơceh lơh, sền sơ wì, kĭ sră pơrgon, lam lơh crap mòn..., pal đal git loh jơnau bơh tài geh ală bơta tìs do mờ kơnòl lời gơlik geh ală bơta ờ niam, kòl yan do. Jat Thủ tướng đơs, broă tă priă lơh ală hìu sơnơm tŭ do neh lơyài uă ngan, priă bơcri gơguh uă. Jơnau gơlik geh broă do dê sơn đờm bơh ală bơta ờ niam, bơta tìs bơh tŭ crơng gơs rơndap broă lơh, pơlam, sền sơ wì rơndap broă lơh, lơh nền bơcri priă, rơ wah cau tờm lơh rơndap broă, sră pơrgon, rơ wah khà priă tă lơh mờ lam lơh jat. Thủ tướng Phạm Minh Chính sồr crơng gơs mpồl lơh broă bơh Kwang đơng lam bồ Ƀộ trưởng Ƀộ Y tế lơh kwang atbồ mpồl, mờ bơta tus bal bơh kwang đơng lam bồ ală Ƀộ Kế hoạc mờ Đầu tư, Bơt bơtàu, Priă jền, Sền gàr adat boh lam mờ Ủy ƀan Ñân zân càr Hà Nam lam lơh mơ tơn broă kờp sền, sền sơ wì wơl jơh broă lam lơh rơndap broă; kờp sền sră nggal adat boh lam, kờp jơh priă bơcri, tŭ tơngai lam lơh mờ ală kal ke, kòl yan ndai.

Cau mblàng K’Duẩn