VOV4.K’ho- Drim ngai 31/07, Thủ tướng Cíñ phủ ồng Phạm Minh Chính neh lòt sền, lơh broă mờ bơyai broă lơh tă bơsong bơta kal ke, kòl yan tàm Rơndăp broă lơh pờ ơnàng lơh sa tơngai dơ̆ 2 Hìu măy Lòs rbă mờ Lòs Thái Nguyên. Geh sơnđờm mŭt lơh bơh nam 2007, mờ kờp jơh priă bơcri bơh sơnrờp 3 rbô 800 tơmàn đong mơya rơndăp broă lơh do gơ dŏ jòng tus tŭ do ờ hềt lơh sir mờ gam geh uă kal ke, kòl yan.

Tơnơ̆ tŭ lòt sền ngan ngồn, Thủ tướng neh đơng lam dơ̆ lơh broă mờ ală ƀộ, ngàñ, anih lơh broă, ƀòn lơgar mờ mpồl lơh sa kă bro nàng iăt yal, geh jơnau đơs, jơnau sồr bơh ală gah geh gơrềng dê. Thủ tướng đơs sùm, kơnòl broă kwơmàng ngan rlau jơh là mhar jòi geh broă lơh bơsong gơtùi lơh jăt ngan ngồn rlau jơh ai rơndăp broă lơh in nàng yal mờ ală kâp geh gơnăp gơnoar in sền swì, lơh nền, tơnơ̆ tŭ kơlôi sơnơng nền, cribơyai, mblàng sền nền jăt tàm bơta geh ngan, bơta jak chài, adat boh lam, pal tềm pềr ngan rlau jơh, geh cồng nha lơh sa jơnhoa ngan rlau jơh ai dà lơgar mờ mpồl lơh sa kă bro in. Tơnơ̆ tŭ iăt yal broă lơh, Thủ tướng đơs sùm, do là rơndăp broă lơh gơ dŏ jòng, lơyài tơngai pơrgon lơh uă nam kờñ pal tơrgùm bơsong jơh jăt jơnau sồr bơh kơrnoăt boh lam dê, jăt nền ală jơnau sồr bơh Ƀộ Cíñ trị dê, jơnau đơs pơndŭt lùp sền dê.

Cau mblàng Lơ Mu K’Yến