Klo ngai 04/05, tàm hìu duh broă Cíñ phủ dê, tơnơ̆ dơ̆ bơyai lơh wă rò mờ tìp măt cribơyai ngan ngồn, Thủ tướng Cíñ phủ lơgar Việt Nam ồng Phạm Minh Chính mờ Thủ tướng lơgar Luxembourg ồng Xavier Bettel sền gŏ kĭ ală sră nggal lơh broă bal mờ tìp măt mờ cau lơh ƀăo nàng yal cồng nha tìp măt cribơyai đah bàr nă Thủ tướng.

Tàm dơ̆ tìp măt mờ cau lơh ƀăo, Thủ tướng Cíñ phủ lơgar Việt Nam ồng Phạm Minh Chính pà gĭt, bàr nă kwang đơng lam bồ pa geh dơ̆ tìp măt cribơyai jơh nùs song dơ pă, ngan ngồn tàm uă broă, pin dờn, bal mờ gơ̆p cribơyai uă broă lơh broă bal tàm uă broă, jăt tàm bơta gĭt gơ̆p đah 2 lơgar kung bè uă lơgar. Thủ tướng lơgar Luxembourg ồng Xavier Bettel pà gĭt, lơgar Luxembourg sùm ơm rềp mờ lơgar Việt Nam tàm tŭ kal ke kung bè tàm tŭ ƀươn mờ bơtàu tơnguh; kơ̆p kờñ mờ pin dờn tơnơ̆ ală dơ̆ lòt còp do, gĭt gơ̆p đah 2 lơgar rơ̆p geh tơnguh tai uă rlau tai, gơlòt mŭt ngan ngồn tàm uă broă mờ lơh geh cồng nha rlau. Thủ tướng ồng Xavier Bettel pà gĭt, 2 gah dùl nùs bal sơlơ lơh broă bal tàm broă bơsong ală broă gùt plai ù, tàm hơ̆ broă tờm là lơh lòt mờ gơdờp mờ tam gơl trồ tiah. Tàm mho ngai 04/05, bàr nă Thủ tướng neh lòt còp Văn Miếu- Quốc Tử Giám mờ Ƀảo tàng Mỹ thuật Việt Nam.