Tàm dơ̆ pơrjum cribơyai, Kwang ătbồ lơgar Brazil pin dờn dơ̆ lòt còp rơ̆p pơgồp bơnah ai gĭt gơ̆p ờs mờng bơh yau lơh bơyô bal mờ lơh broă bal niam bơnĕ đah 2 lơgar gơguh dùl gơnoar broă pa tàm tơngai tus, tă pơgồp uă ngan ai ring lơngai, kơ̆ kơl jăp, bơtàu tơnguh tàm kơnhoàl ù tiah do mờ tàm dunia in. Bàr gah chờ hờp ngan tŭ gŏ bơta gĭt gơ̆p 2 lơgar pơn jăt tai bơtàu tơnguh uă ngan mờ ngai sơlơ geh cồng nha, geh kwơ ngan, ngan là bè cíñ trị, cribơyai broă mờ lơgar ndai, lơh sa kă bro, sền gàr dà lơgar lơngăp lơngai, lơh broă sa sươn sre, jak chài măy mok, niam chài, bơto bơtê.

Bàr gah dùl nùs ring bal pơn jăt tai sơlơ tơnguh tai ală dơ̆ lòt còp, tìp măt kwang bàng kâp dờng mờ ală kâp tàm jơh ală gah: Đảng, Dà lơgar, Cíñ phủ, Quôk hội; pơgồp bal bơyai lơh niam ală broă lơh tơngkah kir sơnrai 35 nam lơh bơta gĭt gơ̆p cribơyai broă mờ lơgar ndai đah 2 lơgar tàm nam 2024 tus.