VOV4.K’ho- Tơnơ̆ tŭ Ngân hàng dà lơgar Mỹ tơnguh tai priă cồng 0,75 điểm bơnah rhiang tàm mang ngai 28/7 mờ ală ngân hàng dà lơgar câu Âu mờ uă lơgar ndai neh uă dơ̆ tơnguh priă cồng nàng sơndră mờ bơta roh bơngă khà priă gơguh jơnhua tàm tơngai rềp ndo, drim ngai 28/7, Thủ tướng ồng Phạm Minh Chính neh đơng lam dơ̆ pơrjum mờ 2, 3 Ƀộ trưởng mờ kwang đơng lam bồ ală ƀộ, gah broă lơh dà lơgar tơrgùm cribơyai ală broă lơh, broă rơcang sơndră dipal jơh bal tềng đap mat mờ jŏ jòng nàng pơn jat tai gròi sền bơta roh bơngă khà priă, gàr kơ̆ kơljap broă lơh sa dờng mờ chồl pràn bơtàu tơnguh wơl, bơtàu tơnguh lơh sa mpồl bơtiàn.

Thủ tướng tơngkah, rài lơh sa lơgar he geh khà bơta pràn uă, bơta dờng gam lơyah, bơta pràn kong jai den ờ huan pràn, den tàng mìng kờñ geh 1 bơta tam gơl dềt tàm bơdìh kung digơlan gơ rềng uă ngan tus tàm lơgar. Tềng đap bơta hơ̆, Thủ tướng sồr ală ƀộ, gah broă lơh dà lơgar, ală tiah tơrgùm jat sền nền nòn, git loh broă gơlik geh, ờ gŏ di sền ờ sơp, tơnguh pràn jak mblàng git loh, đơs lài, rơcang lài geh broă lơh sơbac mhar mờ broă lơh di pal, di tŭ, ngac ngar, jak chài, geh cồng nha jơh bal tềng đap mat mờ jŏ jòng.

Cau mblàng K’Duẩn