Tàm dơ̆ tìp, Thủ tướng ồng Phạm Minh Chính đơs tờm lơgar Việt Nam sền kwơ mờ kờñ bal gơnoar tờm bơh Liê hợp quốk dê tàm mpồl atbồ gùt plai ù, nàng rơcang sơndră mờ mờ bơta lòng dờng màng ngan tŭ do mờ lơgar Việt Nam hơ geh pơgồp bal pràn tàm ală broă ai lơh lài dờng bơh Pơrjum dờng Khoă 78 dê. Củ tịc Pơrjum dờng Liên hợp quốk ồng Dennis Francis đơs niam bơta git gơ̆p đah Liên hợp quốk mờ lơgar Việt Nam.

Ồng Dennis Francis đơs là lơgar Việt Nam geh uă cồng nha bè broă ai làng bol lik klàs mờ rơƀah bal mờ bơtàu tơnguh dà lơgar, gơtùi tam pà bal mờ dunia, geh lơh pràn broă lơh broă bal lơh jăt ală Jơnau kờñ Bơtàu tơnguh Kơl jăp, rơcang sơndră mờ tam gơl trồ tiah, bơta tơl phan sa. Củ tịc Pơrjum dờng ring bal geh lơh broă bal mờ lơgar Việt Nam nàng lơh pràn broă lơh jăt Sơnoa boh lam Liên hợp quốk, adăt boh lam dunia mờ nùs nhơm uă lơgar.

Kung tàm dơ̆ do, Thủ tướng Cíñ phủ ồng Phạm Minh Chính neh tìp mờ Thủ tướng lơgar Thái Lan. Bàr gah ring bal geh lơh jăt ală bơta tờm lơh broă bal nàng lơh pràn bơta git gơ̆p Tam klăc lơh broă bal jŏ jòng đah lơgar Việt Nam mờ lơgar Thái Lan pơn jăt tai jrô ơnàng, geh cồng nha, mùl màl.