Nàng kờñ sơlơ tơnguh rlau tai bơta git gơp lơh bơyô mờ tàm tơrbŏ bal jơh nùs rlau, bàr Thủ tướng Việt Nam mờ Timor- Leste ring bal sơlơ tơnguh rlau tai broă cribơyai mpồl kwang bàng kâp dờng mờ ală kâp, tềng đap mat là dơ̆ lòt còp bơh Kwang atbồ lơgar Timor- Leste dê tus Việt Nam. Bàr Thủ tướng đơs nền, pơn jat tai tàm dong kờl bal mờ gơp mờ pơgồp bal geh cồng nha tàm ală dơ̆ cribơyai uă lơgar tàm tiah do mờ dunia.

Tàm dơ̆ wă Củ tịc WEF ồng Klaus Schwab, Thủ tướng Cíñ phủ đơs nền, Việt Nam rơp pơn jat tai tus bal, tă pơgồp jơh nùs ai ală jơnau bơceh lơh, broă lơh bơh WEF dê. Kơp kờñ WEF rơp pơgồp bal mờ Việt Nam bơyai lơh uă broă lơh bơ tòm tơrgùm ală cau jak chài, ală cau ai tơlik rơndap broă lơh sa khà dùl dunia mờ tiah do nàng bal mờ gơp cribơyai ală broă sền gròi bal, pơgồp bơnah lơh gơlik ală bơta gơn kơnờm pa, tàm hơ̆ geh broă ngui ală bơta gơguh jak khoa họk kông nghệ nàng sơlơ chồl pràn bơtàu tơnguh wơl mờ gơguh lơh sa gùt plai ù.