Tàm dơ̆ tìp mat, Thủ tướng Phạm Minh Chính neh nting bơr gờm chờ lơgar Lào bơyai lơh geh cồng nha Pơrjum Ủy hội dà dờng Mekong dunia dơ̆ 4, bơh hơ̆ pơgồp bơnah tơnguh gơnoar broă mờ bơta kuơ bơh lơgar Lào dê tàm tiah do. 2 Thủ tướng chờ hờp mờ đơs niam bơta bơtàu tơnguh niam bơnĕ bơh bơta git gơp lơh bơyô dờng màng, tam klac kuơmàng mờ lơh broă bal tơl làm Việt Nam- Lào tàm ală gah đah 2 lơgar tàm tơngai lài. Kuơmàng, lơh broă bal kă bro là bơta niam bal mờ kờp jơh priă lơh geh bơh kă bro đah 2 lơgar gùt nam 2022 geh rlau 1 tơmàn 700 tơlak dolar Mỹ, gơguh rlau 24% pơndrờm mờ nam 2021.

Bàr gah ring bal lơh ngan lam lơh jat Jơnau ring bal kuơmàng lơh broă bal Việt Nam- Lào tơngai bơh nam 2021 tus nam 2030, Hiệp địñ lơh broă bal 2 gah Việt Nam- Lào tơngai bơh nam 2021 tus nam 2023 mờ ală jơnau ring bal, broă rơndap lơh lơh broă bal neh kĭ tàm ală gah; pơn jat tai pơgồp bal sền gàr lơngăp lơngai, ring lơngai mpồl bơtiàn; sơlơ tơnguh lơh broă bal sền gàr lơngăp lơngai, sền gàr dà lơgar. 2 gah kung ring bal pơn jat tai tơnguh lơh broă bal lơh sa, dong kờl gơp bơtàu tơnguh wơl tơnơ̆ kòp bơtờp, bơt bơtàu rài lơh sa lơngăp lơngai is, lơh tờm is, gơ jat bal mờ mut gơ rờm bal dunia ngan ngồn, jrô ơnàng mờ geh cồng nha.