Đơs tàm broă lơh do, Thủ tướng ồng Phạm Minh Chính đơs wih đơs wơl, tŭ do, lơgar Việt Nam gam gàr kơnhăp kơ̆ kơl jăp lơh sa dờng, gròi sền roh giă priă, gàr niam dồs dà lơgar, gơguh tă kes priă, dồs lơgar ndai, dồs Cíñ phủ tàm khà ai gơnoar; lơngăp lơngai is, gơnoar tờm ù tiah, tơl làm ù tiah dà lơgar geh gàr kơnhăp, rơndăp tăp sèng niam jơh gùt mpồl bơtiàn, sền gàr niam rài kis mpồl bơtiàn, sền gàr tiah ơm kis ring bal geh gàr niam; lơh pràn broă lơh rơcăng lài, dră wơl sa kwề sa kwà; broă lơh cribơyai broă mờ lơgar ndai lơh geh uă cồng nha niam ngan.

Tơngai tus, bè jơnau kờñ, Thủ tướng đơs wih đơs wơl, jơnau kờñ jŏ jòng: pơnđơl pràn tus nam 2030 (tơngkah kir sơnrai 100 nam ngai tơlik măt Đảng) là lơgar gam bơtàu tơnguh, geh lơh sa mờ măy mok jak chài pa, priă lơh geh kờp bal jơnhoa; tus nam 2045 (tơngkah kir sơnrai 100 nam ngai crơng gơs Lơgar), là lơgar bơtàu tơnguh, geh priă lơh geh uă. Nam 2024 geh gĭt nền là nam tơnguh mhar, tam gơl pràn, geh gơtha kwơmàng ngan tàm broă lơh jăt geh cồng nha Broă rơndăp lơh 05 nam tơngai bơh nam 2021- 2025 mờ Broă rơndăp lơh jŏ jòng 10 nam bơh nam 2021- 2030, tàm hơ̆ cồng nha nam 2024 pal niam rlau mờ nam 2023 bè jơnau sồr bơh Tổng Ƀí thư ồng Nguyễn Phú Trọng dê.