VOV4.K’ho- Mho ngai 15/03/2022, tàm Hìu duh broă Cíñ phủ dê, Thủ tướng Cíñ phủ ồng Phạm Minh Chính neh tìp măt cribơyai broă mờ ồng Julius Maada Bio, Kwang ătbồ lơgar Sierra Leone. Thủ tướng đơs niam ngan ală bơta bơtàu tơnguh niam bơnĕ tàm bơta gĭt gơ̆p đah bàr lơgar. Bàr gah gam uă ngan bơta pràn nàng gơtùi lơh tơnguh rlau tai cồng nha lơh broă bal, ngan là tàm ală gah broă lơh: kă bro, bơcri priă, lơh broă sa sươn sre, kông nghệ, bơto bơtê, lơngăp lơngai, sền gàr dà lơgar, tìp măt lơh kwèng bal đah làng bol...

Thủ tướng Cíñ phủ ồng Phạm Minh Chính mờ ồng Julius Maada Bio, Kwang ătbồ lơgar Sierra Leone

Thủ tướng sồr ală Ƀộ, gah lơh broă kâp dà lơgar bal mờ mpồl lơh sa kă bro bơh 2 lơgar dê pal pơgồp bal niam, lam lơh jăt geh cồng nha ală jơnau ring bal lơh broă bal tàm ală gah broă lơh geh uă bơta pràn, lơh bơnàng jă rề ơnàng tus ală gah broă lơh ndai. Thủ tướng Cíñ phủ ồng Phạm Minh Chính mờ Kwang ătbồ lơgar Sierra Leone ồng Julius Maada Bio pin dờn bơta gĭt gơ̆p lơh bơyô bal mờ lơh broă bal đah Việt Nam mờ Sierra Leone geh sùm bơtàu tơnguh tài bơta kwơ bơh làng bol 2 lơgar dê, tài bơta ring lơngai mờ bơtàu tơnguh tàm kơnhoàl ù tiah do mờ tàm dunia.

Cau mblàng Lơ Mu K’Yến