VOV4.K’ho- Tàm dơ̆ tìp măt mờ Củ tịc Pơrjum dờng ală lơgar tàm Liên hợp quôk ồng Abdulla Shahid, geh anih lơh broă tàm New York, lơgar Mỹ, Thủ tướng Cíñ phủ ồng Phạm Minh Chính jờng rơ ngan ală broă lơh lài bơh Pơrjum dờng ală lơgar tàm Liên hợp quôk khoă 76 dê tàm gah broă lơh bơtàu tơnguh kơ̆ kơl jăp, bơtàu tơnguh wơl tơnơ̆ tơngai gơbàn kòp dờng, sơndră wơl mờ tam gơl trồ tiah, lơh tam gơl pa Liên hợp quôk.

Thủ tướng ồng Phạm Minh Chính đơs sùm, là dà lơgar rềp kềng dà lềng, Việt Nam sền gròi ngan sơlơ tơnguh tai lơngăp lơngai dà lềng, tàm hơ̆ geh broă prăp gàr, ngui dà lềng, ngui ală phan kwơ dà lềng kơ̆ kơl jăp, sền gàr tiah ơm kis ring lơngai, kơ̆ kơl jăp mờ yờ tơnguh broă lơh jăt adat boh lam dunia, ngan là Kông ươk Liên hợp quôk bè Adat Dà lềng nam 1982 (UNCLOS); kơ̆p kờñ Củ tịc Pơrjum dờng ală lơgar tàm Liên hợp quôk sền gròi, lơh broă do dùl bă dipal tài bơh do là bơta sền gròi bal, dipal bơh gal ngan ală lơgar tàm Liên hợp quôk dê. Cribơyai bè ală broă dunia mờ broă tàm tiah do sền gròi bal, 2 gah đơs sùm jơnau kờñ sơlơ tơnguh tai nùs nhơm uă lơgar mờ lơh broă bal dunia nàng sơndră wơl geh cồng nha mờ ală bơta lòng gùt plai ù, ngan là kòp bơtờp mờ tam gơl trồ tiah.

Cau mblàng Lơ Mu K’Yến