Kung tàm dơ̆ lòt còp ngan ngồn lơgar Kộng hòa Zân củ Nhân zân Lào, mho ngai 11/01/2023, tàm Hìu lơh broă Quôk hội Lào, Thủ tướng Cíñ phủ ồng Phạm Minh Chính neh tìp mat Củ tịc Quôk hội lơgar Lào ồng Saysomphone Phomvihane.

Tàm dơ̆ tìp mat, 2 nă Kwang đơng lam bồ đơs nền sùm sền dờng màng mờ lời ai lài ngan rlau jơh ai broă bơt bơtàu mờ sơlơ tơnguh bơta gĭt gơ̆p lơh bơyô dờng màng, tam klăc bal kwơ màng mờ lơh broă bal tơl làm Việt Nam mờ Lào; bơta gĭt gơ̆p lơh broă bal đah 2 gah kung gam pơn jat tai gàr niam bơta bơtàu tơnguh tàm jơh ală gah. Củ tịc Quôk hội Lào kơ̆p kờñ sùm lơh niam rlau tai bơta gĭt gơ̆p lơh broă bal đềt mềr đah Quôk hội 2 lơgar dê. Củ tịc Quôk hội Lào kung ưn ngài Việt Nam neh lời ai bơta kờñ, bơta dong kờl dờng màng ai lơgar Lào in tàm tơngai pa do, tàm hơ̆ geh broă bơt pà Cờn hìu Quôk hội Lào; đơs nền sùm kờñ broă sơlơ tơnguh mờ lơh jrô ơnàng làm uă rlau tai bơta gĭt gơ̆p lơh bơyô dờng màng, tam klăc bal kwơ màng mờ lơh broă bal tơl làm Việt Nam mờ Lào.