Thủ tướng ồng Phạm Minh Chính đơs nền, dơ̆ lòt còp ngan ngồn lơgar Australia bơh Mpồl kwang bàng kâp dờng lơgar Việt Nam dê geh gơtha kuơmàng ngan, ai tơnggŏ bơta kơp kờñ bal mờ Australia lơh kơ̆ kơljap mờ lơh niam rlau tai bơta git gơp đah 2 lơgar, kung bè sơlơ tơnguh tai bơta git gơp lơh broă bal jơh nùs đah Quôk hội Việt Nam mờ Nghị viện Australia, pơgồp bơnah lơh gơlik bơta kơp kơnờm lơh broă bal pa tàm tơngai tus.

Bàr nă kwang đơng lam bồ ring bal sơlơ tơrbŏ kơ̆ rlau tai cribơyai broă mờ lơgar ndai làng bol, lơh broă bal rơcang sơndră tam gơl nhơm trồ tiah, pờ gùng par tơn nàng pờ ơnàng lơh broă bal bơto bơtê mờ bơsram, lòt nhơl. Di dơ̆ do, Thủ tướng Cíñ phủ ồng Phạm Minh Chính kơp kờñ Nghị viện Austrlia pơn jat tai lơh gơlik bơta ƀuơn ai mpồl bơtiàn cau Việt Nam in tă pơgồp ai bơta bơtàu tơnguh bơh Australia mờ bơta git gơp 2 lơgar dê in.

Kung tàm dơ̆ lòt còp ngan ngồn lơgar Australia, Thủ tướng Cíñ phủ ồng Phạm Minh Chính neh wă rò Kwang đơng lam bồ Đảng Khat gơboh Australia ồng Peter Dutton. Tàm dơ̆ wă rò, bàr nă kwang đơng lam bồ ring bal sơlơ tơnguh tai tàm pơ gơl cribơyai broă mpồl mờ tìp mat kwang bàng kâp dờng; sơlơ tơnguh tai lơh broă mờ lơgar ndai gah Đảng mờ tìp mat lơh kwèng làng bol, lơh gơlik bơta niam ai ală mpồl lơh bơyô 2 lơgar bơyai lơh ală broă lơh niam chài, tàp pràn să jan, dong kờl cau.