Tàm dơ̆ tìp, Thủ tướng ồng Phạm Minh Chính đơs tờm, kơ̆p kờñ lơh nền nòn rơlao tai bơta git gơ̆p lơh broă bal do, cèng wơl bơta kwơ mùl màl ai làng bol in, pơgồp bal mờ bơta ring lơngai, lơngăp lơngai mờ kơ̆ kơl jăp tàm tiah do.

Bàr gah ring bal lơh pràn broă tàm pơgơl mpồl kwang bàng kấp dờng mờ ală kấp lòt còp bal, tàm hơ̆ geh tàm broă yal tơngit bal broă mờng chài đah ală Đảng at gơnoar, tìp bal làng bol. Bàr kwang đơng lam đơs tờm pal lơh ngan kờñ ai priă geh bơh kă bro bàr đah geh 10 tơmàn dolar Mỹ bơh broă ai geh ală broă lơh geh bơta ƀuơn pờ mpồng drà kă bro ai ală bơta phan tăc mờ lơgar bơdìh tờm đah bàr lơgar dê. Thủ tướng ồng Phạm Minh Chính đơs nền, lơgar Việt Nam tŭ lơi kung rơcang ai phe jŏ jòng, jŏ tơngai, kơl jăp mờ khà priă di pal ai lơgar Philippines in, bơh tŭ hơ̆ geh pơgồp bal tàm broă dong kờl lơgar Philippines geh tơl phe sa.