Mpồl bơtiàn làng bol Việt Nam geh rlau 25 rơbô nă cau gam bơsram sră, ơm kis, lơh broă, mŭt gơ rờm bal niam, geh rài kis kơ̆ kơljap mờ geh gơnoar atbồ lơgar Hà Lan jờng rơ uă ngan. Thủ tướng jờng rơ uă ngan cồng nha bơh mpồl bơtiàn làng bol Việt Nam kis tàm lơgar Hà Lan, dùl mpồl bơtiàn dờng tàm câu Âu.

Làng bol tam klăc bal, ring bal tàm mpồl bơtiàn; gơ gơs rbàng tàm tơrbŏ kwơ màng, dong yal tơngĭt mờ jun phan bơna Việt Nam tàm drà kă bro Hà Lan mờ ală lơgar câu Âu ndai. Chờ hờp tài bơh làng bol neh lơh geh Mpồl cau Việt Nam tàm Hà Lan, Thủ tướng kơ̆p kờñ lơh tai ală mpồl, mpồl ndai bè mpồl cau lơh broă sa, khoa học, kơlôi sơnơng... tàm mpồl bơtiàn làng bol Việt Nam tàm Hà Lan. Yal mờ làng bol in bè broă sền gàr, bơt bơtàu, bơtàu tơnguh dà lơgar, Thủ tướng pà gĭt, tŭ do priă lơh geh kờp bal tơl nă làng bol Việt Nam dê neh geh mờr 4 rơbô dolar Mỹ mờ GDP gùt lơgar geh 400 tơmàn dolar Mỹ. Dà lơgar he ờ hềt tŭ lơi geh phan bơna, bơta pràn, gơnoar broă mờ bơngă pin dờn tàm dunia bè ngai do.