Di broă do, cau lam bồ Cíñ phủ lơgar Việt Nam kờp dŭ geh ală dơ̆ tìp mat đah 2 gah, tìp mat mờ cribơyai mờ kwang đơng lam bồ gơnoar atbồ, Quôk hội lơgar Mỹ, tus bal bàr pe broă lơh geh gơrềng tus lơh sa, kă bro đah 2 lơgar dê. Tiah lòt còp sơn rờp bơh Thủ tướng ồng Phạm Minh Chính dê tàm lơgar Mỹ là San Francisco mờ uă broă lơh kwơ màng.

Ngan là, Thủ tướng Cíñ phủ ồng Phạm Minh Chính rơ̆p tus bal mờ đơs tàm Cribơyai Mpồl lơh sa kă bro đah Việt Nam mờ Mỹ nam 2023 mờ tơngume “Tơnguh bơta gĭt gơ̆p Việt Nam mờ Mỹ mờ tŭ tơngai niam ai mpồl lơh sa kă bro 2 lơgar in”. Cau lam bồ Cíñ phủ Việt Nam kung rơ̆p tus còp bàr pe mpồl lơh sa kă bro kông nghệ bơh lơgar Mỹ dê tàm Tiah thòng Silicon; còp mờ lơh broă tàm Kông ty lơh gơlik chĭp ƀán dẫn  NVIDIA; còp mờ lơh broă tàm Kông ty Meta.

Tơnơ̆ tŭ tus ƀòn dờng San Francisco, ƀang California, lơgar Mỹ, Thủ tướng Cíñ phủ ồng Phạm Minh Chính neh geh dơ̆ tìp mat cèng uă bơta ngoh rơngac mờ ala mat mpồl bơtiàn cau Việt Nam tàm lơgar Mỹ. Tàm dơ̆ tìp mat, ala mat làng bol Việt Nam tàm lơgar Mỹ ai tơnggŏ bơta chờ hờp tơnơ̆ tŭ Việt Nam mờ Mỹ gơ gơs là Lơgar lơh broă bal jŏ jòng tơl làm bơh gơp dê; kuơmàng là chờ hờp bè ală cồng nha bơtàu tơnguh lơh sa- mpồl bơtiàn bơh dà lơgar dê tàm tơngai lài, ngan là bơtàu tơnguh wơl mờ bơtàu tơnguh lơh sa mpồl bơtiàn tơnơ̆ kòp dờng Kovid-19, pơn jat tai mut gơ rờm bal dunia jrô ơnàng, tơnguh gơnoar broă, bơngă pin dờn tàm muh mat dunia.

Đơs nền là mpồl ờ gơtùi tam cah is bơh mpồl bơtiàn jơi bơtiàn Việt Nam dê bè Đảng, Dà lơgar neh git nền, làng bol lơgar he tàm lơgar ndai kơp kờñ pơn jat tai lam lơh ngan ngồn broă lơh cèng bơta pròc mgàm tờm, nùs nhơm làng bol jơi bơtiàn bal do nàng làng bol he tàm lơgar ndai geh tă pơgồp uă rlau tai ai broă lơh bơt bơtàu dà lơgar mờ sơlơ bơtàu tơnguh bơta git gơp đah Việt Nam mờ Mỹ. Thủ tướng Cíñ phủ ồng Phạm Minh Chính đơs là, tàm tơngai bơtàu tơnguh bơta git gơp đah Việt Nam mờ Mỹ, mpồl bơtiàn cau Việt Nam tàm lơgar Mỹ đơs bal mờ làng bol tàm ƀang California đơs is geh tă pơgồp kuơmàng, Thủ tướng đơs nền, Đảng, Dà lơgar sùm sền gròi tus mpồl bơtiàn cau Việt Nam tàm lơgar ndai, kơp kờñ tàm tơngai tus, mpồl bơtiàn cau lơh sa kă bro, ală cau geh bồ tơngoh bơsram sră, cau jak chài Việt Nam tàm lơgar Mỹ pơn jat tai lòt bal mờ bơta bơtàu tơnguh bơh dà lơgar dê.