VOV4.K’ho- Tàm dơ̆ tìp măt mpồl coh plai cau ùr dà lơgar mho ngai 10/02, Thủ tướng Cíñ phủ ồng Phạm Minh Chính đơs sùm: Mờ ală cồng nha lơh geh, bơta lơh ngan, pơđơl pràn uă ngan nàng dơ̆ sơnrờp tàm jơnau kah yau Mpồl coh plai cau ùr dà lơgar bơh bol he dê ai geh gơnoar mŭt bal tàm dar pơrlòng coh plai dŭt ndơl dunia (World Cup 2023), añ geh hòi ală “ùr ơruh kim kương” bơh tàp pràn să jan Việt Nam dê.

Thủ tướng ồng Phạm Minh Chính đơs sùm, broă mpồl coh plai cau ùr dà lơgar ai geh gơnoar mŭt tus World Cup là cồng nha lơh geh dờng ngan rlau jơh tàm jơnau kah yau coh plai Việt Nam. Cồng nha do là bơta chờ hờp ai jơh gùt lơgar in tàm ală ngai bồ sơnam pa. Thủ tướng kơ̆p kờñ là, Mpồl coh plai cau ùr dà lơgar sùm gàr kơ̆ bơta lơh ngan jơh nùs uă nàng lơh geh cồng nha tàm pơrlòng jơnhoa ngan rlau jơh tàm ală dơ̆ pơrlòng pơn jăt tai, tềng đăp măt là sền gàr gơtùi “ơm khà dùl” tàm SEA Games 31 tàm nhai 05 tus. Kung tàm dơ̆ tìp măt sơl, ala măt Cơldŭ lơh broă Cíñ phủ jàu 4 tơmàn 500 tơlak đong (bơh priă mpồl bơtiàn tă pơgồp); Ủy ƀan Olympic Việt Nam jàu 3 tơmàn 600 tơlak đong; Ngân hàng Bơcri priă mờ Bơtàu tơnguh Việt Nam jàu 2 tơmàn đong; Tập đoàn TH jàu 1 tơmàn 500 tơlak đong (tàm hơ̆ geh dùl tơmàn priă măt mờ phan bơna) pà Mpồl coh plai cau ùr dà lơgar Việt Nam in.

Cau mblàng Lơ Mu K’Yến