Tàm dơ̆ tìp, bàr nă Thủ tướng dùl nùs bal đơs bơta gĭt gơ̆p lơh bơyô bal dờng ngan, tam klăc bal dờng màng mờ lơh broă bal tơl làm đah Việt Nam mờ Lào pơn jăt tai bơtàu tơnguh niam bơnĕ, kơ̆ kơl jăp mờ geh cồng nha tàm jơh ală gah broă lơh tàm tơngai do. Lơh broă bal lơh sa, kă bro, bơcri priă pơn jăt tai geh lơh pràn mờ geh uă bơta tam gơl niam. Kă bro phan 2 gah tàm qúy I nam 2024 lơh geh 476 tơlak 800 rbô dolar Mỹ, gơguh 12% pơndrờm bal dùl tŭ mờ nam 2023. Lơh broă bal tàm ală gah broă lơh ndai, bè: bơto- bơtê, niam chài, jak chài măy mok, lòt nhơl mờ tìp măt lơh kwèng bal đah làng bol…pơn jăt tai geh lơh pràn jăt gùng dà tơngguh uă cồng nha mờ ngan ngồn. Di tàm dơ̆ do, bàr nă Thủ tướng neh tam cribơyai bal ală broă lơh loh làng nàng kờñ lơh jăt gơtùi ală jơnau ring bal kwang bàng kâp dờng mờ cồng nha pơrjum dơ̆ 46, Ủy ƀan bàr Cíñ phủ Việt Nam mờ Lào dê. Bàr gah dùl nùs bal sơlơ tàm tơrbŏ bal 2 rài lơh sa, ngan là bè adăt boh lam, priă jền, phan bơna gùng lòt, năng lượng, viễn thông, lòt nhơl; tàm dong kờl bal bơ̆t bơtàu rài lơh sa krơi is, rơcăng is, gơjăt bal mờ rơcăng lài, jơh nùs mŭt gơrờm bal mờ dunia jrô ơnàng làm uă, ngan ngồn mờ geh cồng nha.

Bàr nă Thủ tướng dùl nùs bal pơn jăt tai pơgồp bal niam, tàm dong kờl bal tàm ală dơ̆ cribơyai kơnhoàl ù tiah do mờ dunia bè Asean, Liên hợp quôk mờ ală mpồl tiah dềt Mekong. Thủ tướng ồng Phạm Minh Chính đơs nền, Việt Nam pơn jăt tai kờñ mờ dong kờl lơgar Lào dờp lơh kơnòl broă geh cồng nha ală kơnòl broă kơn jơ̆ kơn jŭt dunia dê tàm nam 2024 do, tàm hơ̆ geh gơnoar broă Củ tịc Asean.