Thủ tướng Cíñ phủ ồng Phạm Minh Chính đơs nền, jat tàm nùs nhơm gĭt gơ̆p lơh bơyô bơh yau mờ lơh broă bal niam, lơgar Việt Nam rcang tam pà bal bơta mờng chài, dong kờl lơgar Timor-Leste gờñ gơ gơs lơgar tàm mpồl dơ̆ 11 bơh hìu bơnhă Asean dê.

Bàr gah ring bal rơ̆p sơlơ tơnguh tàm pơgơl mpồl kwang bàng kấp dờng mờ ală kấp, lam lơh geh cồng nha ală jơnau ring bal neh kĭ; cih dờp gam uă bơta ƀuơn, bơta pràn lơh broă bal, ngan là kă bro- bơcri priă, mờ ring bal lơh geh ală bơta ƀuơn ƀoài ai mpồl lơh sa kă bro 2 lơgar in lơh sa kă bro, lơh broă geh cồng nha tàm drà kă bro bal mờ gơ̆p dê. Bàr nă Thủ tướng kung ring bal sơlơ tơnguh lơh broă bal niam chài, lòt nhơl, bơto bơtê, tìp mat lơh kuèng làng bol nàng kờñ sơlơ tơnguh bơta tam klăc bal, rề ơnàng tus ală gah broă pa bè tam gơl sồ, gơguh lơh sa tơlir, lơh sa tàm pơdar.