Đơs chờ hờp wă rò kwang đơng lam bồ 19 Tập đoàn khà dùl lơgar Lo dê tàm gah broă lơh bơtàu tơnguh tơlir, lơh sa sồ mờ ală cau ala măt tus bal tìp măt tơm bơh bơr đềt mềr do, Thủ tướng Cíñ phủ ồng Phạm Minh Chính đơs nền: Đảng, Dà lơgar Việt Nam sùm sền bơtàu tơngguh gĭt gơ̆p lơh bơyô bal mờ lơgar Lo là jơnau sồr ngan ngồn, săc rwah jŏ jòng mờ ai lài khà dùl tàm jơh ală gùng dà lơh broă mờ lơgar ndai bơh lơgar Việt Nam dê.

Mờ đơs là, tìp măt tơm bơh bơr đềt mềr là dùl broă lam lơh jăt loh làng bơta gĭt wă bal kwang bàng kâp dờng bơh bàr Đảng, bàr lơgar dê tàm tơngguh tai gĭt gơ̆p tam klăc lơh broă bal jŏ jòng tơl làm đah Việt Nam mờ Lo, pơgồp bơnah bơ̆t bơtàu Mpồl bơtiàn tam pà bal rài tơnơ̆ do Việt Nam mờ Lo geh bơta kwơ jŏ jòng, Thủ tướng kơ̆p kờñ ală mpồl lơh sa kă bro lơgar Lo dê rơ̆p bal mờ ală Ƀộ, gah lơh broă lơgar Việt Nam dê cribơyai tơm bơh bơr song dơ pă, jơh nùs, yal ală jơnau kơlôi lơh, jơnau bơceh lơh lơh broă bal geh kwơ ngan nàng tơngume lơh broă bal lơh sa, kă bro phan, bơcri priă ngai sơlơ “ngan ngồn jrô ơnàng rlau”.