Ngai 26/06, tàm Hìu lơh broă Quôk hội, càr lơgar Bắc Kinh, lơgar Lo, tàm dơ̆ lòt lơh broă tus bal pơrjum pah nam ală lơgar lam lài dơ̆ 15 bơh dơ̆ pơrjum cribơyai lơh sa dunia tàm Đại Liên mờ lơh broă tàm lơgar Lo, Thủ tướng Cíñ phủ ồng Phạm Minh Chính tìp mat Tổng Ƀí thư Ƀan Cấp hành Đảng Kộng sản lơgar Lo, Củ tịc lơgar Lo ồng Tập Cận Bình.

Tàm dơ̆ tìp mat, 2 nă kwang đơng lam bồ ring bal pơn jat tai lơh ngan ngồn bơta gĭt wă bal kwang bàng kấp dờng, ngan là jơnau yal bơr bal Việt Nam mờ Lo bè broă pơn jat tai lơh jrô ơnàng làm uă mờ tơnguh gơnoar broă bơta gĭt gơ̆p lơh broă bal kwơ màng tơl làm, bơt bơtàu mpồl bơtiàn tam pà bal rài tơnơ̆ do Việt Nam mờ Lo geh gơtha kwơ màng jat broă lơh “6 rlau”. Thủ tướng ồng Phạm Minh Chính sồr 2 gah lơh broă bal bơt bơtàu ală broă lơh bơt bơtàu dờng, cèng bơta pơrya uă mờ gơtùi mut lơh broă ngan ngồn, kơ̆ kơl jăp. 2 gah kung cribơyai bè ală broă dunia, tàm tiah do mờ 2 gah sền gròi bal, ring bal gròi sền bal mờ bơsong di pal bơta ờ ring bal, gàr niam ring lơngai, kơ̆ kơl jăp tàm dà lềng.