Tàm nùs nhơm sơrmah sơrmài, Thủ tướng Cíñ phủ ồng Phạm Minh Chính đơs niam gơnoar broă mờ broă tă pơgồp bal bơh Tổng Thư ký mờ Liên hợp quốk dê ai ring lơngai, kơl jăp mờ lơngăp lơngai dunia in, bơsong ală tiah gơlik geh bơta ờ niam, mờ đơs sùm lơgar Việt Nam kờñ bal mờ tŭ lơi kung geh pơgồp bal tàm ală broă lơh ngan hơ̆. Thủ tướng Cíñ phủ kờñ ală broă lơh geh ai lài tŭ do bơh Tổng Thư ký dê, tàm hơ̆ geh bal broă rơcang ai Pơrjum Dờng Tơnơ̆ do kờp dŭ geh bơyai lơh tàm nam 2024.

Thủ tướng pà git lơgar Việt Nam gam lơh ngan pơgồp bal mờ ală mpồl lơh broă tàm Liên hợp quốk lơh uă broă lơh bal, tàm hơ̆ uă ngan là bè gàr niam bơta lơngăp lơngai dunia, tus bal sền gàr bơta ring lơngai Liên hợp quốk tàm uă tiah gơtìp kal ke, tam gơl nàng lơh jăt ală Jơnau kờñ bơtàu tơnguh kơl jăp, tam gơl năng lượng ndrờm bal, lơh jăt ndrờm bal mpồl bơtiàn, ờ sơbì cau lơi hờ tơnơ̆... Di tàm dơ̆ do, Thủ tướng Cíñ phủ ồng Phạm Minh Chính jà Tổng Thư ký ồng Antonio Guters còp tai lơgar Việt Nam.

 Kung tàm New York, Thủ tướng Cíñ phủ ồng Phạm Minh Chính neh wă Kwang ala mat bơh Kwang atbồ lơgar Mỹ dê bè trồ tiah ồng John Kerry, cribơyai bè ală broă lơh nàng mhar lơh jat ală jơnau ring bal kuơmàng bơh dơ̆ lòt còp dê, ngan là tàm gah rơcang sơndră mờ tam gơl trồ tiah. Kung tàm ngai 21/9, jat jơ tiah do, Thủ tướng Phạm Minh Chính neh cribơyai broă lơh geh tơngume “Sơlơ chồl pràn gơguh lơh sa mờ bơtàu tơnguh kơ̆ kơl jap tàm tiah lơh sa gùt plai ù tam gơl” mờ ală giáo sư, cau jak chài lơh sa, cau kơlôi sơnơng khà dùl tus bơh ală hìu bơsram đại họk Harvard, Columbia, Yale. Do là ală Hìu bơsram mờ anih kơlôi sơnơng broă lơh geh bơhiàn jŏ rài, bơta gơ rềng mờ tiơng pơn rơ tàm jơh bal lơgar Mỹ mờ gùt dunia dê. Đơs sơn đờm dơ̆ cribơyai, Thủ tướng Phạm Minh Chính đơs nền, Việt Nam sùm sền dờng màng broă sơlơ tìp mat tơm boh bơr, cribơyai, pơlam broă lơh bè ală broă lơh sa, lơh ală anih tờm kơlôi sơnơng khà dùl bơh dunia dê.