Tàm ờ hềt tơl 3 ngai, Thủ tướng neh đơng lam, tus bal pơgap 40 broă lơh, tàm hơ̆ geh ală dơ̆ pơrjum bơh Pơrjum Kwang bàng kấp dờng G7 rề ơnàng, ală dơ̆ tìp mat mờ kwang đơng lam bồ lơgar Nhờk, ală kwang bàng, mpồl lơh sa kă bro, gơ̆p bơyô lơgar Nhờk mờ ală dơ̆ cribơyai, tìp mat mờ kwang đơng lam bồ ală lơgar mờ ală mpồl dunia.

Gơwèt mờ lơgar Nhờk, ală dơ̆ tìp mat, cribơyai bơh Thủ tướng Cíñ phủ ồng Phạm Minh Chính mờ Thủ tướng lơgar Nhờk, Kwang đơng lam bồ càr Hiroshima mờ uă ngan ală kwang bàng bơh lơgar Nhờk dê neh pơgồp bơnah tơnguh uă rlau tai bơta pin dờn cíñ trị, sơlơ tơnguh pràn kơl dang bơta gĭt gơ̆p lơh broă bal kwơ màng jrô ơnàng làm uă đah Việt Nam mờ Nhờk. Thủ tướng Cíñ phủ ồng Phạm Minh Chính kung neh geh gĭt nđờ jơ̆t dơ̆ tìp mat đah 2 gah jat tàm nùs nhơm sơrmah sơrmài, song dơ pă, jơh nùs bal mờ jơh ală kwang đơng lam bồ G7, ală lơgar là năc jà, ală mpồl dunia nàng cribơyai ală broă lơh ngan ngồn, geh ngan nàng sơlơ tơnguh bơta gĭt gơ̆p đah 2 gah mờ sơlơ tơnguh pơgồp bal tàm ală broă sền gròi bal.