Tàm pơrjum WEF Đại Liên, mờ bơta tờm là jơnau đơs is ồn tàm dơ̆ sơnđờm mut pơrjum bal, tềng đap pơgap 1 rơbô 700 nă năc jà bơh 80 Dà lơgar, Thủ tướng Cíñ phủ neh đơs jơnau lơh gơ kờñ bơh lơgar Việt Nam dê bè tam gơl pa, mut gơ rờm bal mờ bơtàu tơnguh. Thủ tướng Cíñ phủ kung đơs ală jơnau yal jrô ơnàng uă ngan, loh làng ngan bè ală cồng nha lơh geh pơn rơ ngan bè lơh sa- mpồl bơtiàn, bè gùng dà broă lơh, rơndăp broă, pơlam gùng dà kwơ màng bơtàu tơnguh Dà lơgar bơh Đảng, Dà lơgar Việt Nam dê.

Tàm dơ̆ lơh broă, Thủ tướng ồng Phạm Minh Chính neh geh broă lơh lơh broă đah 2 gah li la uă ngan, geh dơ̆ tìp mat, cribơyai mờ Tổng Ƀí thư, Củ tịc lơgar Lo ồng Tập Cận Bình, Thủ tướng Cíñ  phủ lơgar Lo ồng Lý Cường, Củ tịc Ủy ƀan Mặt trận dà lơgar Lo ồng Vương Hộ Ninh; bal mờ Kwang bàng Ƀộ Cíñ trị, Phó Thủ tướng Cíñ phủ lơgar Lo ồng Trương Quốc Thanh tus bal mờ đơs tàm “pơrjum lơh broă bal Việt Nam mờ Lo bè bơtàu tơnguh phan bơna bơt bơtàu kwơ màng gùng lòt rê mờ gơnoar bơh ală mpồl lơh sa kă bro Việt Nam mờ Lo.