Lòt còp Hìu ràng tơlik “Sươn ồng Sáu Dân dê” tàm Tiah kah kơlôi ƀồc Thủ tướng lài do ồng Võ Văn Kiệt tàm kơnhoàl Vũng Liêm, càr Vĩnh Long.

Chu ñàng tềng jơnăng duh khuai ơn rùp ƀồc Thủ tướng lài do ồng Võ Văn Kiệt, Thủ tướng Cíñ phủ ồng Phạm Minh Chính mờ Mpồl kwang bàng ala măt tơlik nùs nhơm kah kơlôi Thủ tướng Võ Văn Kiệt, kòn bơnus bơh broă lơh dê, khin kơlôi, khin lơh, khin kong kơnòl, sùm dùl nùs bal mờ tŭ lơi kung rơcăng ơn pơdơng să jan ai bơta pa in; hơ sùm đòm krơh ƀồc Thủ tướng lài do ồng Võ Văn Kiệt pơn jăt tai cơnđoà lòt yờ tơnguh uă nùs nhơm tam gơl bơta yau gơs bơta pa, jơh nùs jơh tồr drơng broă Dà lơgar, drơng broă làng bol in, jơh ală tài jơnau kờñ làng bol pas sơm, dà lơgar pràn kơldang, làng bol lơh tờm, ring bal, jak chài bơtàu tơnguh. Tơnơ̆ dơ̆ bơyai lơh chu ñàng, Thủ tướng Cíñ phủ ồng Phạm Minh Chính mờ Mpồl kwang bàng ala măt tus bal Dơ̆ bơyai lơh tăc dờng màng ală tem ƀưu cíñ “Tơngkah kir sơnrai 100 nam ngai deh ƀồc Thủ tướng lài do ồng Võ Văn Kiệt geh bơyai lơh tơn tàm ƀlàng Tiah kah kơlôi ƀồc Thủ tướng lài do ồng Võ Văn Kiệt.