Di dơ̆ tus bal Tơngleh Kwang bàng Kâp dờng khoă 78 Pơrjum dờng Liên hợp quôk mờ lơh broă đah 2 gah tàm lơgar Mỹ, drim ngai 18/09, jăt jiơ tiah do dê, tàm ƀòn dờng San Francisco, ƀang California, Thủ tướng Cíñ phủ ồng Phạm Minh Chính tus bal “Cribơyai Lơh sa Kă bro đah lơgar Việt Nam mờ Mỹ lơh broă bal tàm gah broă lơh măy mok, tam gơl pa bơceh lơh” bơh Ƀộ Kế hoặc mờ Đầu tư neh pơgồp bal mờ Tổng Lãñ sự quán lơgar Việt Nam tàm San Francisco mờ Mpồl duh broă Lơh sa Kă bro đah Mỹ mờ Asean nàng bơyai lơh.

Tàm dơ̆ cribơyai, ala măt ală mpồl lơh sa kă bro 2 lơgar dê neh geh ală dơ̆ cribơyai sơrmah sơrmài, song dơ pă mờ ngan ngồn bè tŭ niam lơh broă bal bơcri priă, tàm hơ̆ tơrgùm tàm gah broă lơh măy mok, tam gơl pa bơceh lơh; kơ̆p kờñ tus bal tàm ală broă lơh tam gơl sồ bơh lơgar Việt Nam dê. Mờ jơnau đơs “cau pràn dong cau lơbơn; cau kơnòm dong cau kra; cau pas, dong cau rƀah” mờ jơnau đơs “lời wơl dùl đah jơnau neh rlau, wèt tus rài tơnơ̆ do, lơh bời wơl sồt mồr bơh rài tam lơh”, Thủ tướng Cíñ phủ kơ̆p kờñ làng bol, mpồl lơh sa kă bro lơgar Mỹ tus lơgar Việt Nam nàng sền gŏ bơta tam gơl pa bơh lơgar Việt Nam dê; đơs nền Cíñ phủ lơgar Việt Nam tŭ lơi kung kờñ pờ mpồng wă rò jơh ală mpồl lơh sa kă bro tus bơcri priă lơh sa kă bro di mờ adăt boh lam, kơ̆ kơl jăp, geh cồng nha tài bơta pràn kơldăng, bơtàu tơnguh sùm bơh tơl lơgar dê, hờm ram, lơngăp lơngai chờ hờp chờ hờñ bơh làng bol dê.