Dơ̆ cribơyai bơh Ƀộ Kế hoạc mờ Đầu tư, Đại sứ quán lơgar Nhờk mờ Mpồl ală mpồl lơh sa lơgar Nhờk dê drơng lơh bal mờ geh pờ tơlik tơn tàm internet tus gĭt nđờ rơbô mpồl lơh sa kă bro tàm gùt lơgar Nhờk.

Đơs tàm dơ̆ cribơyai, Thủ tướng Cíñ phủ ồng Phạm Minh Chính neh đơs dùl ết bè ală bơta pơn rơ ngan đah bơta gĭt gơ̆p Việt Nam mờ Nhờk, Thủ tướng đơs sùm, Nhờk neh lơh geh ală cồng nha dờng ngan mờ rài lơh sa bơtàu tơnguh tàm bơta jak chài uă, geh ngui kông nghệ pa lam lài tàm dunia mờ là dùl tàm ală lơgar lam lài bè ngui khoa họk kông nghệ mờ bơtàu tơnguh lơh sa sồ, mpồl bơtiàn sồ. Dơ̆ cribơyai là broă lơh geh gơtha kwơ màng nàng 2 lơgar in mblàng sền tŭ tơngai niam, ngui niam tŭ tơngai kung bè ală bơta kal ke, bơta lòng pa; tam pà bal ală jơnau bơsram mờng chài nàng bơh hơ̆ ai tơlik ală gùng dà broă lơh, kơnòl broă, broă lơh tàm tơngai tus; dong bol he lơh geh jơnau kờñ, bơta kơ̆p kờñ bơtàu tơnguh kơ̆ kơljap tàm tơl lơgar dê, mờ pơgồp bơnah sơlơ tơnguh bơta gĭt gơ̆p lơh broă bal kwơ màng pin dờn bal, rềp mềl bal đah Việt Nam mờ Nhờk. Thủ tướng sồr ală Ƀộ, ngàñ, ală cau jak chài, ală mpồl cau, mpồl lơh sa kă bro Nhờk mờ Việt Nam bal mờ gơ̆p cribơyai, tam pà bal bơta mờng chài nàng cribơyai bal dong Cíñ phủ ală broă lơh geh ngan nàng wèt tus bơta bơtàu tơnguh kơ̆ kơljap mờ pas gơs đah 2 gah dê.