VOV4.K’ho- Drim ngai 26/01, Thủ tướng Cíñ phủ ồng Phạm Minh Chính tus bal dơ̆ ai ngui rbàng Cửa Lục 1 mờ gùng kìng dà lềng Hạ Long- Cẩm Phả tơngai dơ̆ 1. Broă lơh geh sơn đờm lam lơh bơh ngai 28/4/2020, bơceh lơh 6 bơnàng rơndeh, jòng 4 rbô 265 thơk, kờp jơh priă tă lơh rlau 2 rbô 100 tơmàn đông. Gơl gùng kìng dà lềng jat kềng gah càr ờ mìng tơrbŏ 2 ƀòn dờng tờm bơh càr dê là Hạ Long mờ Cẩm Phả mờ gam tơrbŏ 2 phan lời wơl Vịnh Hạ Long mờ Bái Tử Long, lơh gơlik bơta niam ai broă lòt rê ƀuơn ƀuài, lơh gơlik bơta ờdo ờdă ai làng bol. Mờ kung pơgồp bơnah ngui dipal ală bơta pràn bè ù tiah tàm tiah mờ gơl gùng gan, lơh gơlik bơta niam ai bơtàu tơnguh kă bro, nhơl chờ, broă drơng ala, crơng gơs uă anih ơhò ơm tàm dà lềng mờ tiah drà jat kềng gah gùng.

Đơs tàm dơ̆ bơyai lơh, Thủ tướng Phạm Minh Chính đơs nền, ală broă lơh, rơndap broă tờm bơh càr Quảng Ninh dê neh mờ gam jơh nùs lam lơh ai gŏ cồng nha bơh càr dê tàm broă lam lơh ală bơta tam gơl kuơmàng bè bơtàu tơnguh phan bơna gùng lòt ù gờl, tam gơl pa, gàr niam bơta tàm tơrbŏ bal jơh ală bơta, chồl pràn tàm tơrbŏ bal ală tiah mờ tàm dơlam tiah do.

Cau mblàng K’Duẩn