VOV4.K’ho- Mang ngai 28/4, Thủ tướng Cíñ phủ ồng Phạm Minh Chính tus bal dơ̆ bơyai lơh tơngkah 30 nam ngai crơng gơs wơl càr Sóc Trăng (4/1992- 4/2022) mờ dờp Huân cương Hồ Chí Minh, yal ƀòn dờng Sóc Trăng là tiah drà khà 2 gơ wèt càr Sóc Trăng. Đơs tàm dơ̆ bơyai lơh, Thủ tướng Cíñ phủ ồng Phạm Minh Chính đơs nền, tơnơ̆ 30 nam bơt bơtàu mờ bơtàu tơnguh, Sóc Trăng pal đal git loh làng ală bơta pràn krơi is, tŭ niam pơn rơ ngan, bơta ƀuơn, bơta pràn tàm pơrlòng nàng bơtàu tơnguh mhar, kơ̆ kơljap mờ nùs nhơm kơnờm tàm bơta pràn is là kuơmàng, là lơh nền, jŏ jòng mờ bơta pràn bơh bơdìh là dờng màng.

Thủ tướng sồr, Sóc Trăng pal pơn jat tai sền gàr, gàr kơ̆ mờ bơt bơtàu bơta tam klac bal, ring bal tàm Đảng ƀộ, gơnoar atbồ, sơlơ tơnguh bơta pràn tam klac dờng đah ală jơi bơtiàn kòn cau. Tơrgùm lam lơh jat geh cồng nha ală Nghị quyết bơh Quôk hội, Cíñ phủ dê bè rơcang sơndră kòp Kovid-19 mờ bơtàu tơnguh wơl, bơtàu tơnguh lơh sa- mpồl bơtiàn; lơh gơs gờñ broă cit sơnơm vaccine ding dơ̆ 3 ai cau bơh 18 sơnam rlau hơđang in, cit sơnơm vaccine ai kơnòm dềt bơh 5 tus hơ đơm 12 sơnam in tàm quý 2 nam 2022 do tơn.

Cau mblàng K’Duẩn