VOV4.K’ho- Đơs tàm dơ̆ Tơngkah kir sơnrai ngai Cau lơh sa kă bro Việt Nam (13/10) mờ jờng rơ cau lơh sa kă bro Việt Nam geh pơn rơ jak geh lơh tàm drim ngai 12/10, Thủ tướng Cíñ phủ ồng Phạm Minh Chính pơyua jơnau nting bơr gờm chờ niam bơnĕ ngan rlau jơh tus ală mpồl lơh sa kă bro, mpồl cau lơh sa kă bro Việt Nam, nting bơr tus ală mpồl lơh sa kă bro, mpồl cau lơh sa kă bro Việt Nam ngai sơlơ bơtàu tơnguh, ngai sơlơ dờng pràn, pơn jat tai tă pơgồp uă rlau tai tàm broă lơh bơt bơtàu mờ bơtàu tơnguh dà lơgar Việt Nam pràn kơldang, pas sơm. Tŭ do, Việt Nam neh geh mờr 900 rbô mpồl lơh sa kă bro gam lơh broă. Mpồl cau lơh sa kă bro gùt lơgar tus tŭ do neh gơguh tus git nđờ tơlak nă cau. Ală mpồl lơh sa kă bro tă pơgồp rlau 60% GDP, mờr 30% kờp jơh khà cau lơh broă gam lơh broă.

Thủ tướng cùp rùp kir sơnrai mờ ală cau ala mat tus bal pơrjum

Đơs tàm dơ̆ bơyai lơh, Thủ tướng Phạm Minh Chính đơs nền, Cíñ phủ geh pơn jat tai bơt bơtàu, lơh sir kơrnuat lơh broă, mpồl lơh broă, sơlơ cribơyai, sùm lòt bal, sùm iat, tam pà, bơsong ală kal ke, kòl yan, jơnau dan, jơnau đơs bơh mpồl lơh sa kă bro dê. Bè đah ală mpồl lơh sa kă bro, cau lơh sa kă bro Việt Nam, Thủ tướng kơp kờñ ală cau lơh sa kă bro geh pơn jat tai tơnguh pràn jak tàm pơrlòng tàm phan lơh gơs, broă drơng ala bơh he dê, pơgồp bơnah bơtàu tơnguh lơh sa- mpồl bơtiàn dà lơgar.

Tàm dơ̆ jờng rơ, Thủ tướng Cíñ phủ ồng Phạm Minh Chính neh jàu pà khà jờng 10 nă cau lơh sa kă bro Việt Nam geh pơn rơ jak ngan rlau jơh Việt Nam nam 2022, Mpồl bơyai lơh jàu pà 6 nă cau lơh sa kă bro geh cồng nha tă pơgồp jak ngan tàm rơcang sơndră kòp Kovid-19 mờ jàu pà 60 khà jờng cau lơh sa kă bro Việt Nam pơn rơ jak nam 2022.

VOV Tây Nguyên- Cau mblàng K’Duẩn