VOV4.K’ho- Mang òr 31/05, tàm Kung Kơnòm dềt Hà Nội, Thủ tướng Cíñ phủ ồng Phạm Minh Chính tus bal Dơ̆ lam lơh Nhai lơh broă tài kơnòm dềt mờ Sơnđờm mŭt kàl rlô bơkang nam 2022 mờ tơngume: “Sơm băt tê dong kờl, bơto bơtê mờ sền gàr kơnòm dềt” nàng kờñ hòi jà bơta lơh bal jơh nùs rlau tai bơh ală mpồl lơh broă cíñ trị- mpồl bơtiàn, mpồl lơh broă mpồl bơtiàn, hìu bơnhă mờ ƀòn lơgar dê tàm broă dong kờl, bơto bơtê mờ sền gàr kơnòm dềt. Dơ̆ bơyai lơh geh pơgăp 1 rbô 200 nă cau ala măt, tàm hơ̆ geh mờr 700 nă oh ala măt ai rlau 25 tơlak nă oh dềt tàm jơh gùt lơgar in tus bal.

Đơs tàm dơ̆ bơyai lơh, Thủ tướng Cíñ phủ ồng Phạm Minh Chính gờm chờ 700 nă cau geh mat ala măt tàm do mờ 25 tơlak nă kơnòm dềt tàm jơh gùt lơgar bal mờ hìu bơnhă, ală pơgru să jan pràn kơldang, chờ hờp, ală sau geh dùl kàl rlô bơkang geh kwơ, chờ hờp chờ hờñ, mờ niam bơnĕ. Di Ngai Dunia Kơnòm dềt 01/06, Dơ̆ lam lơh Nhai lơh broă tài kơnòm dềt mờ Sơnđờm mŭt kàl rlô bơkang nam 2022, Thủ tướng Cíñ phủ ồng Phạm Minh Chính mờ kwang đơng lam bồ ală ƀộ, ngàñ mờ kwang đơng lam bồ Ủy ban Ñân zân ƀòn dờng Hà Nội neh lòt còp ală cau kòp là kơnòm dềt gam sơm kòp tàm Anih tờm Kòp ung thư mờ ală cau kòp là kơnòm dềt gam sơm kòp pràn kơldang bồ tơngoh hwềng nùs tơnơ̆ tơngai gơbàn kòp Kovid-19 tàm Hìu sơnơm Kơnòm dềt Dà lơgar.

Cau mblàng Lơ Mu K’Yến