Mờr 500 nă kwang bàng tus bal dơ̆ mut cribơyai, mờ bơta geh mat bơh Thủ tướng Cíñ phủ lơgar Lào – Củ tịc ASEAN nam 2024; ồng Kao Kim Hourn, Tổng Thư ký ASEAN; ală Ƀộ trưởng, đại sứ, kwang ala mat Cíñ phủ ală lơgar ASEAN, ală lơgar lơh broă bal tìp mat tơm boh bơr, ală mpồl lơh broă dunia. 

Cribơyai Rài tơnơ̆ do ASEAN nam 2024 mờ tơngume “Bơt bơtàu Mpồl bơtiàn ASEAN bơtàu tơnguh mhar, kơ̆ kơljap, ai làng bol lơh tờm” là dùl jơnau bơceh lơh kuơmàng bơh Thủ tướng ồng Phạm Minh Chính sồr lơh tàm Pơrjum kwang bàng kâp dờng ASEAN dơ̆ 43 tàm nhai 9 nam 2023. Do là jơnau bơceh pa bơh Việt Nam dê mờ bơta kơp kờñ lơh gơs cribơyai bal ai ală lơgar tàm mpồl ASEAN in kung bè ală bơyô lơh broă bal bơh ASEAN dê, làng bol ASEAN tă pơgồp bal tàm broă lơh geh, đal git gùng bơtàu tơnguh ai rơnàng tơnơ̆ do bơh ASEAN dê in. Đơs tàm cribơyai, Thủ tướng ồng Phạm Minh Chính đơs nền, nàng lam lơh ngan ngồn Broă rơndap lơh ASEAN nam 2045, pal lam lơh 5 bơta sơlơ tơnguh tai mờ Việt Nam rơp pơn jat tai lơh ngan rlau tai nàng at tê bal cih tai ală jơnau cồng nha, lơh gơs rài tơnơ̆ do ring bal tàm bơta li la bơh ASEAN dê.