VOV4.K’ho- Drim ngai 05/09, tàm nùs nhơm hô hơng bơh ngai chờ lòt bơsram, Thủ tướng Cíñ phủ ồng Phạm Minh Chính jơh nùs pơyoa tus ală cau pơgru, kwang bàng, kông cứk, viên cứk, cau lơh broă gah bơto bơtê bal mờ ală kơnòm bơsram jơh gùt lơgar mờ Hìu bơsram bơdìh dà lơgar Đoàn Thị Điểm jơnau còp să rềp mềl ngan, jơnau lùp còp jơh nùs ngan mờ jơnau gờm chờ nam bơsram pa niam bơnĕ ngan rlau jơh.

Thủ tướng đơs gờm chờ nam bơsram pa

Thủ tướng kơ̆p kờñ tàm ală ngai lòt bơsram ală kơnòm bơsram geh bơsram ală jơnau bơsram bè nùs nhơm gĭt ưn ngài mờ bơta kờñ gơboh ƀòn lơgar, dà lơgar. Gĭt ưn ngài mè bèp, ồng mò, cau pơgru neh ngai mang jơh nùs sền gròi bơto bơtê he. Ală kơnòm bơsram geh bơsram ală jơnau bơsram bè bơta lơh ngan, pơnđơl pràn lơh ngan, kis geh bơta kơ̆p gơn mờ geh bơta kôi sơnơng, ngan là bơh ală krơh àng tàm rài kah yau jơi bơtiàn dê. Gơwèt mờ ală kwang bàng, gah lơh broă, ngan là Ƀộ Giáo zụk mờ Đào tạo pal tơrgùm bơsong hời rơ hời ală bơta gam gơ kòl, bơta ờ hềt pràn mờ ală bơta ờ niam gơlik geh. Kơnòl broă tềng đap mat kờñ pal bơsong gờñ 3 bơta ờ tơl, hơ̆ là ờ tơl cau pơgru- ờ tơl ơdŭ bơsram- ờ tơl sră giáo khoa. Lơh jat broă cĭt vaccine rcang sơndră kòp tơl làm, niam, geh cồng nha nàng ală kơnòm bơsram in pràn kơl dang lòt bơsram, mè bèp iang nùs lơh broă, cau pơgru iang nùs bơto bơtê.

Cau mblàng K’Hạnh