VOV4.K’ho- Drim ngai 20/06, tàm tiah nhàr lơgar đah kơnhoàl Lộc Ninh, càr Bình Phước mờ kơnhoàl Memot, càr Tbong Khmum, lơgar Campuchia, Thủ tướng Campuchia  ồng Hun Sen neh đơng lam dơ̆ wă Thủ tướng Cíñ phủ ồng Phạm Minh Chính mờ mpồl kwang bàng kấp dờng Việt Nam tus  bal ală broă lơh tơngkah kir sơnrai đah lơgar Campuchia dê.

Thủ tướng Cíñ phủ ồng Phạm Minh Chính tus bal dơ̆ tơngkah dơ̆ 45 nam Gùng lòt wèt tus lơh gơ lừ rài gơ sơ̆t rung Pol Pot

Đơs tàm dơ̆ tơngkah, Thủ tướng lơgar Campuchia dùl dơ̆ tai đơs ngan là broă lơh bơh Việt Nam dê là di pal ngan, ală cau ling dong kờl is Việt Nam neh tus bal mờ lơgar Campuchia tàm broă lơh tơngklàs dà lơgar, dong klàs làng bol Campuchia lik klàs bơh rài bol Pol Pot gơ sơ̆t rung, bơtàu bơtàu wơl mờ bơtàu tơnguh  dà lơgar. 2 nă Thủ tướng tơngŏ bơta chờ hờp bơta tam klăc, lơh bơyô jŏ jòng mờ bơta gĭt gơ̆p lơh broă bal tơl làm niam bơnĕ đah Việt Nam mờ Campuchia pơn jat tai geh bơt bơtàu mờ bơtàu tơnguh tàm uă gah, cèng wơl bơta kwơ geh ngan ai làng bol 2 lơgar in, pơgồp bơnah kwơ màng tàm bơta ring lơngai, kơ̆ kơljap, bơtàu tơnguh tàm tiah do mờ tàm dunia. 2 nă Thủ tướng đơs ngan sền bơta gĭt gơ̆p “lơgar rềp bal niam bơnĕ, lơh bơyô bơh jŏ, lơh broă bal tơl làm, kơ̆ kơljap mờ jŏ jòng” kwơ màng đah 2 jơi bơtiàn dê.

Cau mblàng K’Hạnh