Mho ngai 19/9, jat jơ tiah do, tàm Viện Hòa Bình lơgar Mỹ, Thủ tướng Cíñ phủ ồng Phạm Minh Chính mờ Mpồl kwang bàng kâp dờng lơgar Việt Nam neh tus bal dơ̆ tơngkah kir sơnrai 78 nam ngai sơntờm lơgar Kộng hòa xã hội củ nghĩa Việt Nam mờ gờm chờ bơta git gơp lơh broă bal kuơmàng tơl làm Việt Nam – Mỹ bơh Đại sứ quán Việt Nam tàm càr lơgar Washington bơyai lơh. Đơs tàm dơ̆ bơyai lơh, ală kwang bàng lơgar Mỹ gờm chờ Thủ tướng Phạm Minh Chính mờ Mpồl kwang bàng kâp dờng lơgar Việt Nam tus lơgar Mỹ mờ geh ală broă lơh 2 gah geh cồng nha, ngan ngồn. Đah lơgar Mỹ đơs nền, geh bơta ring bal bơh jơh bal 2 đảng cíñ trị là Zân củ mờ Kộng hòa dê tàm jơh ală gah gơnoar atbồ mờ Quôk hội sền dờng màng bơta git gơp mờ Việt Nam, kờñ Việt Nam “Pràn kơldang, lơngăp lơngai is, bơtàu tơnguh mờ brồ guh is”.

Thủ tướng Phạm Minh Chính neh yal, tàm dơ̆ lòt còp neh geh uă dơ̆ lơh broă, cribơyai mờ ală tiah, mpồl lơh sa kă bro lơgar Mỹ, kuơmàng gơ rềng tus gah kông nghệ kao, ƀán zẫn. Thủ tướng ai lơh niam nùs tềng đap bơta pơn đơl pràn bơh ală mpồl lơh sa kă bro dờng lơgar Mỹ dê pơn jat tai rề ơnàng bơcri priă, lơh broă bal mờ Việt Nam mờ ring bal là, 2 gah pal sơlơ chồl pràn lam lơh ngan ngồn, mhar lơh ală tŭ niam gơ gơs ngan ngồn.