VOV4.K’ho- Thủ tướng Cíñ phủ ồng Phạm Minh Chính tàm ngai 06/03 neh tus bal Pơrjum dong bơtàu tơnguh lơh broă sa sươn sre Tiah ring dà dờng Cửu Long gơdờp bal mờ tam gơl trồ tiah tàm càr Kiên Giang. Broă lơh bơh Ƀộ Nông nghiệp mờ Phát triển Nông thôn dê bal mờ 13 càr mờ ƀòn dờng tàm Tiah ring dà dờng Cửu Long pơgồp bal bơyai lơh.

Pơrjum dong bơtàu tơnguh lơh broă sa sươn sre Tiah ring dà dờng Cửu Long gơdờp bal mờ tam gơl trồ tiah là jơnau geh bơta kwơ dờng màng, geh kwơ ngan ngồn nàng kờñ lơh jăt ngan ngồn lơh jăt pràn kơldang rlau tai broă lam lơh jăt Kơrnoăt Pơrjum dờng dơ̆ XIII bơh Đảng dê mờ ală Kơrnoăt, gùng dà broă lơh dờng bơh Đảng, Dà lơgar mờ Cíñ phủ dê bè bơtàu tơnguh lơh broă sa sươn sre. Jăt jơnau kờñ bơtàu tơnguh Tiah ring dà dờng Cửu Long tus nam 2025 lơh geh khà gơguh GDP lơh broă sa sươn sre geh rlau 3% tàm dùl nam. Priă lơh geh kờp bal dùl nă cau tàm tiah ƀòn lơgar gơguh êt ngan rlau jơh là bơh 2 dơ̆ pơndrờm mờ nam 2018.

Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs loh, bơngă, gơnoar broă bơh Tiah ring dà dờng Cửu Long dê, gàr gơnoar broă kwơmàng ngan jơh bal bè cíñ trị, lơh sa, mpồl bơtiàn, lơngăp lơngai sền gàr dà lơgar, tàm broă lòt rê kă bro mờ ală lơgar ASEAN mờ Tiah dềt dà dờng Mekong. Thủ tướng sồr, ngui bơta pràn nàng bơtàu tơnguh lơh broă sa sươn sre ƀòn brê bơnơm geh cồng nha uă, ƀòn lơgar pa, cau lơh broă sa jak chài; gĭt nền cau lơh broă sa là cau tờm, ƀòn lơgar là bơnàng jă, lơh broă sa sươn sre là bơta gơn kơnờm; rơcăng lài gơdờp bal mờ tam gơl trồ tiah, pal tàm pơgồp bal niam lơh broă sa sươn sre, lơh sa mờ măy mok, drơng broă. Lơh sa mờ măy mok mờ drơng broă pal là phan dong kờl bơtàu tơnguh lơh broă sa sươn sre nàng cèng wơl priă jền jơngkah uă rlau.

Cau mblàng Lơ Mu K’Yến