Ngai 19/08, Thủ tướng Cíñ phủ ồng Phạm Minh Chính tus bal Pơrjum Tơn jơh nam bơsram 2023- 2024 mờ lam lơh jăt kơnòl broă nam bơsram 2024- 2025 bơh Ƀộ Bơto bơtê mờ Bơsram dê bơyai lơh jăt broă lơh pờ tơlik tơn tàm internet đah anih bơyai lơh tờm là Hà Nội pờ tus 63 càr mờ ƀòn dờng tàm jơh gùt lơgar. Ala măt Cíñ phủ, Thủ tướng Cíñ phủ ồng Phạm Minh Chính cih dờp, jờng rơ ngan, jờng rơ mờ jơh nùs chờ hờp mờ ală cồng nha kwơmàng neh lơh geh bơh gah Bơto bơtê dê tàm nam bơsram pa do, pơgồp bơnah tàm cồng nha bal bơh dà lơgar dê tàm tơngai lài.

Bè bàr pe kơnòl broă mờ broă lơh tờm, Thủ tướng ồng Phạm Minh Chính sồr Ƀộ Bơto bơtê mờ Bơsram, ală ƀộ, gah broă, ală tiah jăt gơnoar broă, kơnòl broă, gơnăp gơnoar tơrgùm lam lơh jăt; di tŭ yal mờ kâp geh gơnăp gơnoar in gơ wèt mờ ală broă sơrlèt gơnăp gơnoar. Ngan là rơcăng lài sir tơl ală bơta ai nam bơsram pa in; lam lơh niam Dơ̆ sơnđờm mŭt nam bơsram pa ngai 05/09 mờr tus, lơh geh nùs nhơm chờ hờp, chờ hờn ai nam bơsram pa in, is ồn là yờ tơngguh bơta jak chài mpồl cau pơgru ngai sơlo jak rlau, lơh geh jơnau kờñ ngan ngồn tàm rài kis.