Drim ngai 09/10, Pơrjum kwang bàng kấp dờng Asean dơ̆ 44, 45, mờ ală pơrjum geh gơrềng neh sơnđờm mut pơrjum yŭ rơyùm tàm Anih tờm Pơrjum Dà lơgar bơh lơgar Lào dê, mờ bơta tus bal bơh Kwang đơng lam bồ ală lơgar Asean, Timor-Leste bal mờ uă ala mat lơgar lơh broă bal, mpồl ală lơgar mờ tàm tiah do dê. Thủ tướng Cíñ phủ ồng Phạm Minh Chính lam bồ Mpồl Kwang bàng kấp dờng lơgar Việt Nam tus bal dơ̆ sơnđờm mut pơrjum.

Đơs tàm dơ̆ sơnđờm mut pơrjum, Tổng Ƀí thư, Củ tịc lơgar Lào ồng Thoong-lun Xi-xu-lít đơs sùm, tàm rài tơnơ̆ rềp ndo, Asean rơ̆p tơrgùm jơh ală lơgar tiah đah Jum mat tơngai lik câu Á mờ broă lơgar Timor-Leste gơ gơs lơgar tàm mpồl tơl làm bơh Asean dê, đơs nền pràn kơl dang bơta li la uă ngan mờ bơta ƀuơn, bơta pràn dờng ngan bơh tiah do dê, mơkung pờ geh tŭ tơngai niam lơh broă bal mờ ală lơgar lơh broă bal. Mờ tơngume “Asean: Sơlơ tơnguh tai tàm tơrbŏ bal mờ Pràn is”, ală broă lơh lài ngan, jơnau bơceh lơh tàm nam Củ tịc bơh Lào dê pơgồp bơnah lơh jat jơnau kờñ bal bơt bơtàu dùl Mpồl bơtiàn Asean tàm tơrbŏ bal rlau tai mờ pràn is rlau tai. Tơnơ̆ dơ̆ sơnđờm mut pơrjum, Thủ tướng Cíñ phủ ồng Phạm Minh Chính bal Kwang đơng lam bồ ală lơgar Asean mờ Timor-Leste tus bal pơrjum tơrgùm bal Pơrjum Kwang bàng kấp dờng Asean, cribơyai bè ală tơngume lơh broă bal tàm Asean mờ đah Asean mờ ală lơgar lơh broă bal.