VOV4.K’ho - Đơs tàm dơ̆ pơrjum cri bơya lơh sa bal, hợp ták xã nam 2022 mờ tơngu me “Tam gơl sồ-Bơta pràn tơnguh bơtàu lơh sa bal, hợp ták xã tàm rài pa pơgồp bal mờ lơh jăt Nghị quyết sồ 20 geh bơyai lơh tàm drim ngai òr (23/09), Thủ tướng Cíñ phủ ồng Phạm Minh Chính đơs loh, tam gơl sồ là broă pal geh mùl màl niam bơh broă tơnguh bơtàu, lơh sa bal, hợp ták xã ờ gơtùi ờ lơh, ờ gơtùi ơm hờ bơdìh; den tàng, he pal tam gơl pa bồ tơngoh, sơn đờm bơh jơnau git wă; nùs nhơm kơlôi sơnơng, tơrgùm bal; pal chồl pràn broă ngui pràn kơl dang khoa họk kông nghệ, kông nghệ thông tin, chồl pràn tam gơl pa bơceh lơh, hòi jà ală bơta pràn, ai geh bơta pràn jăt mờ bơta lơh bàn, gơguh bal mờ ală tiah lơh sa ndai.

          Thủ tướng Cíñ phủ ồng Phạm Minh Chính tus pơrjum cri bơyai lơh sa bal, hợp ták xã nam 2022

Pơrjum cri bơyai geh bơyai lơh jăt broă lơh tơn pơgồp bal mờ broă pờ tơlik tàm internet. Tàm pơrjum, ală kwang bàng neh cri bơyai, sền wơl ală cồng nha neh lơh geh tàm broă tam gơl sồ dà lơgar đơs bal mờ tam gơl sồ tàm tiah lơh sa bal, hợp ták xã đơs is; mờ song dơ pă sền wơl ală broă lơh ngan ờ pràn, kal ke, tơlòng mờ ală broă gam geh ai tŭ do nàng geh ală broă lơh di pal nàng chồl pràn broă tam gơl sồ tàm tơngai tus, ai geh bơta pràn tus mờ broă lơh sa bal, hợp ták xã tơnguh bơtàu mhar mờ kơl jăp, pơgồp bal mờ broă lơh mùl màl jơh Nghị quyết sồ 20 bơh Dà lơgar.

Cau mblàng Ndong Brawl