Anih R&D pa bơh Samsung tàm Hà Nội geh mŭt lơh nhai 3 nam 2020, tàm bă ù ơnàng rơlao 11 rơbô 600 thơ̆k vuông, geh hìu ñhoa 16 cờn mờ 3 cờn tàm tiah ù, kờp khà priă bơcri 220 tơlăk dolar Mỹ. Anih R&D bơh Samsung tàm Hà Nội là Anih R&D dờng ngan Đông Nam Á mờ là 1 tàm 18 anih R&D bơh Samsung dê tàm gùt dunia. Tàm Anih R&D Hà Nội, Samsung kờp dŭ geh bơyai lơh kơlôi sơnơng mờ tơnguh bơtàu điện thoại ngăc ngar, măi tíñ ƀảng, phần kứng mờ phần mềm, hòi jà geh di pơgăp 3 rơbô nă cau mŭt lơh broă.

Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs tờm, Anih R&D Samsung mŭt lơh broă là bơta lài ngan nàng Samsung lơh jăt tơl ală jơnau kờñ tơnguh bơtàu; là cơng tàng ai gŏ ală gùng dà broă lơh di pal bơh Đảng, Dà lơgar Việt Nam dê tàm broă hòi jà mờ hòi jà bơcri priă tàm khoa họk kông nghệ, tam gơl pa bơceh pa, tơnguh bơtàu kông nghệ kao. Thủ tướng ồng Phạm Minh Chính sồr ală anih lơh broă dà lơgar bal mờ gơnoar atbồ tàm do pơn jăt tai dong kờl mờ ai tơl bơta ƀuơn ală cau bơcri priă lơgar bơdìh in, tàm hơ̆ geh Tập đoàn Samsung bơcri priă kă bro geh cồng nha mờ jŏ jòng tàm lơgar Việt Nam.

Kung tàm drim ngai 23/12, Thủ tướng Cíñ phủ ồng Phạm Minh Chính neh wă ồng Lee Jae Yong, Củ tịc Tập đoàn Samsung. Tàm dơ̆ tìp mat, Thủ tướng đơs niam bơta lơh ngan bơh Samsung dê tàm broă lơh gơs Anih tờm R&D, ưn ngài ală tă pơgồp bơh Samsung dê gơ wèt mờ Việt Nam mờ gơnoar broă là mpồl lơh sa kă bro FDI dờng ngan rlau jơh, tam pà mờ Samsung bè ală kal ke tàm tơngai kòp Kovid-19, nting bơr Samsung lơh geh cồng nha tơl làm rlau tai tàm Việt Nam. Thủ tướng kung sồr Kông ty tơnguh khà lơh gơs tàm lơgar, bơta kuơ lơh sa tàm lơgar Việt Nam, tơrmù blơi phan bơh lơgar ndai. Củ tịc Samsung đơs nền geh jơh nùs lơh jat ală tơngume mờ Thủ tướng Cíñ phủ neh đơng lam; tơnguh broă bơto bơtê, bơtàu tơnguh cau lơh broă gơtùi drơng anih lơh broă gùt plai ù mờ pơgồp bal mờ đah Việt Nam nàng tơnguh rlau tai khà lơh gơs phan tàm lơgar jơh bal phần kứng mờ phần mềm.