VOV4.K’ho - Drim òr (24/03), Thủ tướng Cíñ phủ ồng Phạm Minh Chính đơng lam Pơrjum pờ tơlik tàm internet gùt lơgar mờ mpồl lơh sa kă bro dà lơgar bè broă “Pơn jăt tai tam gơl pa, tơnguh uă cồng nha broă lơh nàng hòi jà bơta pràn bơh mpồl lơh sa kă bro dà lơgar tàm broă tơnguh bơtàu lơh sa mpồl bơtiàn”.

Thủ tướng Cíñ phủ ồng Phạm Minh Chính tus pơrjum pờ tơlik tàm internet gùt lơgar mờ mpồl lơh sa kă bro dà lơgar

Đơs tàm pơrjum, Thủ tướng đơs loh, Pơrjum geh bơyai lơh tàm tŭ dà lơgar gam lơh jăt broă brồ guh wơl lơh sa jăt mờ Nghị quyết bơh Đảng, Quốc hội mờ Cíñ phủ. Cíñ phủ neh mờ gam lơh jăt geh cồng nha gùng dà broă lơh “Gơdờp ờ do ờ dă, ndrờm bal, sền gròi geh cồng nha kòp kovid-19”, ai geh bơnàng jă nàng brồ guh wơl mhar, tơnguh bơtàu kơl jăp lơh sa mpồl bơtiàn. Cíñ phủ ai mpồl lơh sa kă bro dà lơgar gàr broă lơh tờm mờ là dùl mpồl kwơ màng bơh lơh sa dà lơgar dê, pơgồp bal kwơ màng, ring niam lơh sa dờng mờ chồl pràn tơnguh bơtàu lơh sa mpồl bơtiàn. Bơdìh hơ̆ tai, Thủ tướng sồr tơnkah, Cíñ phủ pal cri bơyai, ai geh ală rơndăp broă, kơnòl, broă lơh pal mùl màl tus tơl ƀộ, gah lơh broă dà lơgar mờ ală càr, ƀòn dờng, tơl tập đoàn, tổng kông ty, mpồl lơh sa kă bro dà lơgar nàng git di pal, broă lơh gơdờp mờ lơh broă pràn mờ geh cồng nha rơlao.

Cau mblàng Ndong Brawl