VOV4.K’ho - Drim òr (04/08), tàm Hà Nội, Ngân hàng Dà lơgar Việt Nam bơyai lơh tam gơl sồ gah Ngân hàng. Thủ tướng Cíñ phủ ồng Phạm Minh Chính tus mờ geh jơnau đơng lam tàm pơrjum.

                Thủ tướng Cíñ phủ ồng Phạm Minh Chính tus pơrjum “Tam gơl sồ gah ngân hàng”

Đơs tàm pơrjum, Thủ tướng Cíñ phủ ồng Phạm Minh Chính đơs là, tam gơl sồ là gùng dà pal geh mờ là jơnau kờñ pal lơh gơwèt mờ he dê. Đảng, Dà lơgar he sền kwơ ngan mờ sền do là dùl tàm ală kơnòl tờm lài ngan. Thủ tướng Cíñ phủ neh kĭ Broă lơh tam gơl sồ dà lơgar tus nam 2025, wèt tus nam 2030. Mờ nùs nhơm tam gơl sồ tơl ală bơta, mờ broă tus bal bơh làng bol, mpồl lơh sa kă bro bal mờ dà lơgar, mơya pal geh lơh tờm, tơrgùm bal; mờ gah Ngân hàng geh tơrgùm tơl ală bơta nàng lam lài tàm broă lơh do. Thủ tướng sồr tơnguh broă lam sồr bè bơta kwơ bơh broă tam gơl sồ tàm gah ngân hàng tus mờ làng bol, mpồl lơh sa kă bro, dong kờl làng bol, mpồl lơh sa kă bro wă loh bè bơta kwơ bal mờ cồng nha.

Cau mblàng Ndong Brawl