VOV4.K’ho - Mho ngai 10/02, tàm Hà Nội, Thủ tướng Cíñ phủ ồng Phạm Minh Chính tus mờ geh jơnau đơng lam tàm dơ̆ pơrjum yal broă lơh bơta pràn kơl dang să jan kơnòm bơsram tơngai bơh nam 2021 tus 2025 geh bơyai lơh pờ tơlik tàm internet bơh Anih tờm Pơrjum dunia Hà Nội mờ 63 càr, ƀòn dờng mờ geh tơrbŏ bal mờ rơlao 41 rơbô 950 hìu bơsram tàm gùt lơgar.

Bal mờ broă pờ mpồng hìu bơsram wơl tàm gùt lơgar, do là broă lơh kwơ màng, ai tơngŏ broă lơh ngan dờng bơh Đảng mờ Dà lơgar tàm broă tơnguh uă bơta niam lơh broă sền gàr bơta pràn kơl dang să jan kơnòm dềt, kơnòm bơsram. Broă lơh bơta pràn kơl dang să jan kơnờm bơsram tơngai bơh nam 2021 tus 2025 ai geh 5 mpồl tơngu me mờ 7 mpồl broă lơh bè broă sền gàr mờ atbồ bơta pràn kơl dang să jan, kơnòm dềt, kơnòm bơsram; bơto bơtê bơta pràn să jan mờ broă tàp pràn să jan tàm hìu bơsram; bơyai lơh ală dơ̆ sào tàm hìu bơsram, gàr niam phan sa bơkah di pal; chồl pràn broă ngui kông nghệ thông tin tàm broă atbồ, đơng lam, sền gròi, kờp, yal; lam sồr, bơto bơtê bơta pràn kơl dang să jan kơnòm bơsram in tàm hìu bơsram.

Đơs tàm do, Thủ tướng Chíñ phủ ồng Phạm Minh Chính jào kơnòl ai ală ƀộ, anih lơh broă, ală càr, ƀòn dờng in mờ hòi jà broă tus bal bơh ală mpồl lơh broă, lơh jăt broă pơgồp bal mờ ală rơndăp broă lơh, broă lơh, rơndăp broă geh ai gơrềng bal nàng chồl pràn broă sền gàr tơl ală bơta, ndrờm bal bè bơta pràn kơl dang să jan, nùs nhơm ai kơnòm dềt, kơnòm bơsram in.

Cau mblàng Ndong Brawl