Pơrjum yal Broă rơndăp ù tiah mờ hòi jà bơcri priă càr Long An là dùl broă lơh geh kwơ màng ngan gơwèt mờ broă lơh jăt Broă rơndăp ù tiah càr, hòi jà geh ală bơta pràn, hòi jà bơcri priă, lơh pràn broă bơtàu tơnguh lơh sa mpồl bơtiàn càr Long An dê tàm tơngai tus. Tàm pơrjum, Ƀộ trưởng Kế hoạc mờ Đầu tư ồng Nguyễn Chí Dũng neh jào Broă rơndăp ù tiah càr tơngai bơh nam 2021 tus 2030, wèt tus nam 2050 ai kwang đơng lam càr Long An in.

Đơs tàm pơrjum, Thủ tướng ồng Phạm Minh Chính đơs tờm, Long An tơrgùm uă bơta pràn nàng tơnguh bơtàu lơh sa mpồl bơtiàn mhar mờ kơl jăp, là anih tus niam bơwèt mờ ală cau bơcri priă tàm lơgar mờ dunia. Càr Long An pal lơh ngan tus nam 2030, là tiah tờm bơtàu tơnguh lơh sa ñhăp ñhar, geh cồng nha, kơl jăp bơh tiah hờ đah jum dê. Kung tàm ngai òr (25/07), Thủ tướng Cíñ phủ ồng Phạm Minh Chính bal mờ mpồl kwang bàng lơh broă bơh Cíñ phủ neh lòt sền rơndăp broă lơh gùng jăt gah 3 ƀòn dờng Hồ Chí Minh lòt gan càr Long An. Broă lơh gơs gùng jăt gah 3 ƀòn dờng Hồ Chí Minh mờ jơnau kờñ tơrbŏ bal mờ ală càr, ƀòn dờng tiah lơh sa tờm hờ đah jum, lơh gơs tiah drà pa, kơl jăp, pơgồp bal tàm broă bơtàu tơnguh lơh sa mpồl bơtiàn dà lơgar in.