Tàm dơ̆ wă Đại sứ at gơnoar broă kwang ala mat lơgar Malaysia, Thủ tướng Cíñ phủ ồng Phạm Minh Chính jờng rơ ồng Dato’ Tan Yang Thai tus dờp kơnòl broă tàm lơgar Việt Nam mờ kơ̆p kờñ tàm tơngai lơh broă bơh he dê, Đại sứ rơ̆p lơh ngan ngui niam gơnoar broă là rƀàng tàm tơrbŏ bal kwơ màng nàng sơlơ tơnguh bơta gĭt gơ̆p do pơn jat tai bơtàu tơnguh ngai sơlơ jrô ơnàng làm uă mờ geh cồng nha.

Tàm dơ̆ wă Đại sứ lơgar Campuchia tàm Việt Nam, Thủ tướng Cíñ phủ ồng Phạm Minh Chính neh gờm chờ mò Chea Kimtha geh pồ  lơh ùr Đại sứ sơn rờp bơh lơgar Campuchia dê tàm lơgar Việt Nam: gờm chờ ală cồng nha dờng màng bè lơh broă bal is tàm lơgar mờ lơh broă mờ lơgar ndai mờ lơgar Campuchia neh lơh geh tàm tơngai pa do. Thủ tướng pin dờn lơgar Campuchia rơ̆p bơyai lơh geh cồng nha dơ̆ tĕ khà Quôk hội khoá VII mờ Dơ̆ tàm pơrlòng dờng Tàp pràn să jan Tiah đah Jum đah mat tơngai lik câu Á dơ̆ 32, đơs nền Việt Nam rcang lài dong kờl, tam pà bal bơta mờng chài nàng lơgar Campuchia in bơyai lơh geh cồng nha broă lơh tàp pràn să jan tàm tiah kwơ màng do. Thủ tướng sồr 2 gah pơn jat tai pơnđơl pràn lơh ngan tìp mat cribơyai bơsong 16% gùng tiah nhàr lơgar tềng hơđang ù gờl ờ hềt lơh sir tiah tam cah is jrong sơn tơ̆p tiah nhàr lơgar dê nàng lơh gùng tiah nhàr lơgar ring lơngai, gĭt gơ̆p lơh bơyô, lơh broă bal mờ bơtàu tơnguh bal; mơkung sồr đah lơgar Campuchia pơn jat tai sền gròi, bơsong ală sră nggal gơrềng tus adat boh lam ai làng bol jơi tờm lơgar Việt Nam dê kis tàm lơgar Campuhcia, lơh geh bơta ƀuơn ƀoài ai mpồl bơtiàn làng bol Việt Nam kis tàm lơgar Campuchia in lơh sa, ơm kis, kơ̆ kơljap tàm lơgar Campuchia.